පසුගිය සඳුදා චීනය විසින් දකුණු පැසිෆික් කලාපයට දිගුදුර බැලස්ටික් මිසයිලයක් අත්හදා බැලීමෙන් දින කිහිපයකට පසු, ජාත්‍යන්තර නීති වෙනුවට බලය රජයන ලෝකයක නවසීලන්තය සඳහා ඉන්දියාව වඩ වඩාත් වැදගත් සහකරුවෙකු වෙමින් පවතින බව නවසීලන්ත අග්‍රාමාත්‍ය ක්‍රිස්ටෝපර් ලක්සන් පවසයි.

ඉන්දීය අග්‍රාමාත්‍ය නරේන්ද්‍ර මෝදිගේ ජූලි 10-11 නවසීලන්ත සංචාරයට පෙර The Indian Express පුවත්පත සමඟ පැවැත්වූ සුවිශේෂී සම්මුඛ සාකච්ඡාවකදී අග්‍රාමාත්‍ය ලක්සන් කියා සිටියේ ගෝලීය පද්ධතිය මේ වන විට “හැරවුම් ලක්ෂ්‍යයක” පවතින බවයි.

එබැවින් නවසීලන්තය වැනි රටවල්, ඉන්දියාව සහ සමාන අදහස් ඇති අනෙකුත් සහකරුවන් සමඟ වඩාත් සමීපව කටයුතු කළ යුතු බව ඔහු අවධාරණය කළේය.

“ඒ ගැන කිසිම සැකයක් නැහැ, අපි ගෝලීය භූ-දේශපාලනයේ හැරවුම් ලක්ෂ්‍යයක ඉන්නේ,” ඔහු පැවසීය. “අපි නීති මත පදනම් වූ ක්‍රමවේදයක සිට බලය මත පදනම් වූ ක්‍රමවේදයක් වෙතටත්, බහුපාර්ශ්වික ක්‍රමවේදයක සිට බහුධ්‍රැවීය ලෝක රටාවකටත් ගමන් කරමින් සිටිනවා.”

ඔහුගේ මෙම අදහස් පළ වූයේ, පසුගිය සඳුදා චීනය විසින් න්‍යෂ්ටික අවි රැගෙන යා හැකි දිගුදුර බැලස්ටික් මිසයිලයක් දකුණු පැසිෆික් කලාපයට අත්හදා බැලීමට නවසීලන්තය ප්‍රතිචාර දක්වමින් සිටින පසුබිමකය.

නවසීලන්ත විදේශ අමාත්‍ය වින්ස්ටන් පීටර්ස් ප්‍රකාශ කළේ මෙම මිසයිල අත්හදා බැලීම පිළිබඳව තමන් දැඩි ලෙස කනස්සල්ලට පත්වන බවත්, එය කිසිසේත් පිළිගත නොහැකි වර්ධනයක් බවත්ය.