මෙම වසරේ මේ දක්වා කාලය තුළ ජර්මනියෙන් අධික උෂ්ණත්වය ආශ්‍රිත මරණ 5,120ක් පමණ වාර්තා වී ඇති බව එරට මහජන සෞඛ්‍ය ආයතනය ප්‍රකාශ කළේය.

මෙම මරණවලින් බහුතරයක් වාර්තා වී ඇත්තේ සතිපතා සාමාන්‍ය උෂ්ණත්වය සෙල්සියස් අංශක 20 සීමාව බොහෝ සෙයින් ඉක්මවා ගිය පසුගිය ජුනි මාසයේ අගභාගයේදීය.

මියගිය පිරිසෙන් 4,270ක් පමණ වයස අවුරුදු 75 හෝ ඊට වැඩි ජ්‍යෙෂ්ඨ පුරවැසියන් බව එම ආයතනයේ සතිපතා වාර්තාවක දැක්වේ. එහිදී පිරිමින්ට වඩා කාන්තාවන් වැඩි පිරිසක් මියගොස් ඇති අතර, ඊට ප්‍රධානතම හේතුව වී ඇත්තේ එරට වයෝවෘද්ධ ජනගහනයෙන් වැඩි ප්‍රතිශතයක් කාන්තාවන් වීමයි.

ජර්මනියෙන් වාර්තා වන මෙම දත්ත සමස්ත යුරෝපය පුරාම පවතින බිහිසුණු තත්ත්වය මනාව පිළිබිඹු කරයි.

යුරෝපා සංගමයේ Copernicus Climate Change සේවාව නිකුත් කළ නිවේදනයක දැක්වෙන්නේ, බටහිර යුරෝපය ඉතිහාසයේ දරුණුතම සහ උණුසුම්ම ජුනි මාසයට මුහුණ දුන් බවයි. එහි සාමාන්‍ය උෂ්ණත්වය සෙල්සියස් අංශක 20.74ක් ලෙස සටහන්ව තිබුණි.

පසුගිය ජුනි 20 වැනිදා සිට 28 වැනිදා දක්වා කාලය තුළ ඇති වූ මෙම දරුණු තාප තරංගය හේතුවෙන් ප්‍රංශය, බෙල්ජියම, ස්පාඤ්ඤය සහ නෙදර්ලන්තය යන රටවල ද සාමාන්‍ය මට්ටමට වඩා වැඩි මරණ 4,700කට අධික සංඛ්‍යාවක් වාර්තා වී ඇති බව එම රටවල බලධාරීන් පවසයි.