ගැටුම් අවසන් කිරීම සඳහා ඉරානය සමඟ අත්සන් කරන ලද අවබෝධතා ගිවිසුම ‘අවසන්’ වී ඇති බව ඇමෙරිකානු ජනාධිපති ඩොනල්ඩ් ට්‍රම්ප් බදාදා (08) ප්‍රකාශ කළ අතර, ටෙහෙරානය සමඟ තවදුරටත් සම්බන්ධ වීමට තමන්ට කිසිදු උනන්දුවක් නොමැති බවද ඔහු පැවසීය.

පාකිස්ථානයේ මැදිහත් වීමෙන් ඇති කරගත් මෙම තාවකාලික සටන් විරාම ගිවිසුම මඟින් ස්ථිර එකඟතාවක් සඳහා සාකච්ඡා කිරීමට දින 60ක කාලයක් ලබාදීමට අපේක්ෂා කෙරිණි.

කෙසේවෙතත්, කටාර් රාජ්‍යයේ පැවැති වක්‍ර සාකච්ඡා කිසිදු ප්‍රගතියකින් තොරව අවසන් වූ අතර, ඉන් අනතුරුව අඟහරුවාදා (07) දිනයේදී ඇමෙරිකාව විසින් ඉරානයට යළිත් ප්‍රහාර එල්ල කරන ලදී.

අන්කාරා නුවර පැවැත්වෙන නේටෝ (NATO) රාජ්‍ය නායක සමුළුවට පෙර අදහස් දක්වමින් ට්‍රම්ප් මෙසේ පැවසීය:

“මට අනුව, මම හිතන්නේ ඒක දැන් ඉවරයි. මට ඔවුන් සමඟ ගනුදෙනු කිරීමට අවශ්‍ය නැහැ.”

මෙහිදී ඔහු ඉරාන නායකත්වය දැඩි ලෙස විවේචනයට ද ලක්කළේය.

හෝමුස් සමුද්‍ර සන්ධියේදී බොරතෙල් ප්‍රවාහන නෞකා තුනකට ප්‍රහාර එල්ල වීමෙන් පසුව, ඉරානයට බොරතෙල්, ඛනිජ රසායනික සහ ඛනිජ තෙල් නිෂ්පාදන අලෙවි කිරීමට අවසර දෙමින් ඇමෙරිකාව ලබා දී තිබූ බලපත්‍රය ද අවලංගු කිරීමට පියවර ගෙන ඇත.

ඒ අනුව, ඊට අදාළ ගනුදෙනු ක්‍රමයෙන් නතරකිරීම සඳහා ඉරානයට ලබන ජූලි 17 වනදා දක්වා කාලය ලබා දී තිබේ.