ග්‍රාමීය ප්‍රදේශවල ක්‍රීඩක ක්‍රීඩිකාවන්ට නවීන පුහුණු යටිතල පහසුකම් සඳහා ඇති ප්‍රවේශය වැඩිදියුණු කිරීමේ අරමුණින්, ශ්‍රී ලංකාවේ ප්‍රථම රජයේ රත් කළ (heated) පිහිනුම් තටාකයේ ඉදිකිරීම් කටයුතු අඟහරුවාදා (07) බණ්ඩාරවෙලදී ආරම්භ කළ බව රජය පවසයි.

මෙම ව්‍යාපෘතිය සඳහා මුල්ගල තැබීම ඌව පළාත් ක්‍රීඩා සංකීර්ණයේදී සිදුකෙරිණි.

ක්‍රීඩා සංවර්ධන දෙපාර්තමේන්තුවේ සෘජු අධීක්ෂණය යටතේ සංවර්ධනය කෙරෙන මෙම පහසුකම සඳහා ඇස්තමේන්තුගත පිරිවැය රුපියල් 144,191,250 කි.

එම අවස්ථාවට එක්වෙමින් ක්‍රීඩා හා යෞවන කටයුතු අමාත්‍ය සුනිල් කුමාර ගමගේ ප්‍රකාශ කළේ තරුණ තරුණියන් අපරාධවලින් මුදවා ක්‍රීඩාව වෙත යොමුකිරීමට රජය දක්වන කැපවීම මෙම ව්‍යාපෘතියෙන් පිළිබිඹු වන බවයි.

“අපට අවශ්‍ය කරන්නේ සිරකරුවන් බිහි කිරීමට නොව, රටට දායකත්වයක් ලබා දිය හැකි විනයගරුක ක්‍රීඩක ක්‍රීඩිකාවන් පිරිසක් බිහි කිරීමටයි” යනුවෙන් අමාත්‍යවරයා පැවසීය.

ග්‍රාමීය ප්‍රජාවන්ගේ ක්‍රීඩක ක්‍රීඩිකාවන්ට ජාතික හා අන්තර්ජාතික මට්ටමින් සාර්ථකව තරඟ කිරීමට හැකි වන පරිදි නවීන ක්‍රීඩා පහසුකම් සැලසීම රජයේ ප්‍රධානතම ප්‍රමුඛතාවක්ව පවතින බව ද ඔහු වැඩිදුරටත් සඳහන් කළේය.

මෙම අවස්ථාවට යෞවන කටයුතු හා ක්‍රීඩා නියෝජ්‍ය අමාත්‍ය සුගත් තිලකරත්න, ඌව පළාත් ආණ්ඩුකාර කපිල ජයසේකර, වැවිලි හා ප්‍රජා යටිතල පහසුකම් අමාත්‍ය සමන්ත විද්‍යාරත්න, සංචාරක නියෝජ්‍ය අමාත්‍ය රුවන් රණසිංහ ඇතුළු රජයේ නියෝජිතයෝ පිරිසක් සහභාගී වූහ.