July 4, 2026
බංග්ලාදේශ ජාතිකයන් සඳහා සංචාරක වීසා නිකුත් කිරීම නැවත ආරම්භ කිරීමට ඉන්දියාව ගත් තීරණය, දෙරට අතර පැවැති නොසන්සුන් සබඳතා යථා තත්ත්වයට පත්වීමේ පැහැදිලිම සලකුණක් ලෙස පෙනෙන්නට තිබේ.
හිටපු බංග්ලාදේශ අග්රාමාත්ය ෂීක් හසීනාට බලයෙන් පහවීමට සහ ඉන්දියාවට පලා යාමට සිදුවූ ප්රචණ්ඩකාරී අරගලවල ප්රතිඵලයක් ලෙස වීසා සේවා අත්හිටුවා වසර දෙකකට පමණ පසු, ඉන්දියාව පසුගිය ඉරිදා සිට බංග්ලාදේශ වැසියන්ගෙන් සංචාරක වීසා අයදුම්පත් භාර ගැනීම නැවත ආරම්භ කළේය.
හසීනා ඉන්දියාවේ රැඳී සිටීම තවදුරටත් රාජ්ය තාන්ත්රික මට්ටමින් යම් නොසන්සුන්තාවකට හේතුවක් වී තිබුණද, අග්රාමාත්ය තාරික් රහ්මාන්ගේ නායකත්වයෙන් යුත් බංග්ලාදේශයේ නව රජය පසුගිය පෙබරවාරි මාසයේදී ඉන්දීය ජාතිකයන් සඳහා පනවා තිබූ වීසා තහනම ඉවත් කිරීමත් සමඟ දෙරටේ සබඳතා වර්ධනය වීමට පටන් ගත්තේය.
පසුගිය මාසයේ ධුරයේ වැඩ භාරගත් බංග්ලාදේශයේ නව ඉන්දීය මහකොමසාරිස් දිනේෂ් ත්රිවේදි වෙත කැබිනට් අමාත්ය ධූරයක මෙන් තනතුර උසස් කිරීමට නවදිල්ලිය කටයුතු කළ අතර, විශ්ලේෂකයින් පවසන්නේ එය තම අසල්වැසියා සමඟ සබඳතාවලට ඉන්දියාව දක්වන ප්රමුඛතාවය පිළිඹිබු කරන්නක් බවයි.
“සංචාරක කටයුතු දැන් ආරම්භ වී තිබෙනවා. දේශසීමා වෙළෙඳාම වැනි අනෙකුත් දේත් සෙමින් යථා තත්ත්වයට පත්වනු ඇතැයි මට විශ්වාසයි,” යනුවෙන් ඉන්දියාවේ ඕ.පී. ජින්ඩාල් ග්ලෝබල් විශ්වවිද්යාලයේ ජාත්යන්තර සබඳතා පිළිබඳ මහාචාර්ය ශ්රීරධා දත්තා ප්රකාශ කළාය.
ඇය පෙන්වා දුන්නේ මෙය ද්විපාර්ශ්වික වෙළෙඳාමට මෙන්ම බංග්ලාදේශය තෙවන පාර්ශවීය රටවලට සිදු කරන අපනයන කටයුතුවලටද යහපත් ප්රතිඵල ගෙන දෙනු ඇති බවයි. බංග්ලාදේශයට තම අපනයන භාණ්ඩ ඉන්දීය ගොඩබිම් වරායවල්, රේගු මධ්යස්ථාන සහ ගුවන් තොටුපළ හරහා වෙනත් වෙළෙඳපොළවල් වෙත ප්රවාහනය කිරීමට ලබා දී තිබූ ‘සංක්රමණ පහසුකම’ (transshipment facility) පසුගිය වසරේදී නවදිල්ලිය විසින් ඉල්ලා අස්කර ගෙන තිබුණි.
