2026 ICC විස්සයි20 කාන්තා ලෝක කුසලාන ක්‍රිකට් තරගාවලියේදී බටහිර ඉන්දීය කොදෙව් කණ්ඩායමට එරෙහිව කඩුලු 6ක විශිෂ්ට ජයක් ලැබීමට අයර්ලන්තය සමත් වුවද, ශ්‍රී ලංකා කණ්ඩායමේ ශුද්ධ ලකුණු වේගය (Net Run Rate) අවම මට්ටමක පැවතීම හේතුවෙන් ඔවුන්ට අවසන් පූර්ව වටයට පිවිසීමේ අවස්ථාව ඊයේ (සෙනසුරාදා) අහිමි විය.

ඊට පෙර දින ස්කොට්ලන්තයට එරෙහිව කඩුලු 3ක තියුණු ජයක් ලබමින් ශ්‍රී ලංකා කණ්ඩායම අවසන් පූර්ව වටයට සුදුසුකම් ලැබීමේ සුළු බලාපොරොත්තුවක් රඳවා තබාගැනීමට සමත් විය. කෙසේවෙතත්, තරගාවලියේ මුල් භාගයේදී ශ්‍රී ලංකාව ලැබූ දරුණු පරාජයන් හේතුවෙන් ඔවුන්ගේ ශුද්ධ ලකුණු වේගය පහළ වැටී තිබූ බැවින්, ඉදිරියට යාමට නම් අයර්ලන්තය විසින් කොදෙව් කණ්ඩායම හමුවේ විශාල ජයක් වාර්තා කළ යුතුව තිබිණි.

තරගයේ කාසිය වාසිය දිනා පළමුවෙන් පන්දු යැවීමට තීරණය කළ අයර්ලන්ත පන්දු යවන්නියෝ, බටහිර ඉන්දීය කොදෙව් කණ්ඩායම නියමිත පන්දුවාර 20 තුළ කඩුලු 7කට ලකුණු 128කට සීමා කිරීමට සමත්වූහ. එහිදී කැරිබියන් පිතිකාරිණියන්ට දැඩි පීඩනයක් එල්ල කළ කාරා මුරේ සහ ඒමී මැගුවයර් කඩුලු 2 බැගින් බිඳහෙළූහ.

ලකුණු 129ක ඉලක්කයක් හඹා ගිය අයර්ලන්ත කණ්ඩායම, තරගය නිමාවීමට පන්දු 11ක් ඉතිරිව තිබියදී කඩුලු 4ක් පමණක් දැවී ඉතා පහසුවෙන් ජයග්‍රහණය වාර්තා කළේය. එහිදී විශිෂ්ට ඉනිමක් ක්‍රීඩා කළ තුන් ඉරියව් ක්‍රීඩිකා ඕර්ලා ප්‍රෙන්ඩර්ගාස්ට්, හතරේ පහර 8ක් සහ හයේ පහර 2ක් සමඟින් පන්දු 44කදී ලකුණු 63ක් රැස් කරමින් සිය කණ්ඩායම අමතක නොවන ජයක කරා මෙහෙයවූවාය.

කෙසේවෙතත්, ශ්‍රී ලංකා කාන්තා කණ්ඩායම මෙවර ලෝක කුසලාන තරගාවලිය නිම කළේ විස්සයි20 ලෝක කුසලාන ඉතිහාසයේ ඔවුන් කණ්ඩායම් වටයේදී දැක්වූ දක්ෂතම දස්කම් වාර්තා කරමිනි.

නායිකා චමරි අතපත්තුගේ නායකත්වය යටතේ ශ්‍රී ලංකා කණ්ඩායම ලෝක කුසලාන තරගාවලි ඉතිහාසයේ පළමු වතාවට කණ්ඩායම් වටයේදී තරග 3ක් ජයග්‍රහණය කිරීමට සමත් විය. ස්කොට්ලන්තයට එරෙහිව ලැබූ අමතක නොවන ජයග්‍රහණය ද ඊට ඇතුළත් වූ අතර, එමඟින් ඔවුන්ගේ අවසන් පූර්ව වටයේ බලාපොරොත්තු කෙටි කලකට හෝ ජීවමානව පැවතිණි. එහෙත්, අවසානයේදී ශුද්ධ ලකුණු වේගයේ පැවති දුර්වලතාව ඔවුන්ට දැඩි පාඩුවක් විය.

අයර්ලන්තය හමුවේ ලැබූ මෙම අනපේක්ෂිත කඩුලු 6ක පරාජයත් සමඟ බටහිර ඉන්දීය කොදෙව් කණ්ඩායමට ද අවසන් පූර්ව වටයට සෘජුවම සුදුසුකම් ලැබීමේ අවස්ථාව අහිමි වී ඇති අතර, ඔවුන්ගේ ඉදිරි ගමන තීරණය වනුයේ එංගලන්තය සහ නවසීලන්තය අතර පැවැත්වෙන දෙවැනි කාණ්ඩයේ අවසන් තරගයේ ප්‍රතිඵලය මතය.

මෙම පරාජය නිසා කොදෙව් කණ්ඩායම ද ශ්‍රී ලංකාව මෙන්ම ප්‍රසාද ලකුණු 6ක් ලබා සම තත්ත්වයේ පසුවන නමුත්, ප්‍රසාද ලකුණු 4ක් ලබා සිටින නවසීලන්තයට තවත් එක් තරගයක් ඉතිරිව පවතී.

ඉදිරි තරගයෙන් එංගලන්තය ජයග්‍රහණය කළහොත්, ශ්‍රී ලංකාවට වඩා වැඩි ශුද්ධ ලකුණු වේගයක් පවත්වා ගෙන යන බටහිර ඉන්දීය කොදෙව් කණ්ඩායම, එංගලන්තය සමඟින් අවසන් පූර්ව වටයට සුදුසුකම් ලබනු ඇත.