දයා ගෲප් ලිමිටඩ් සහ දයා ඇපරල් එක්ස්පෝර්ට් පෞද්ගලික සමාගම වෙතින් අයවිය යුතු ඇමෙරිකානු ඩොලර් මිලියන 1.42කට අධික නොපියවූ ණය මුදලක් අයකර ගැනීම සඳහා, ඔවුන් උකස් කර තිබූ දේපළ වෙන්දේසි කිරීමට මහජන බැංකුවට ඇති අයිතිය තහවුරු කරමින් අභියාචනාධිකරණය ලබාදුන් තීන්දුව මඩකලපුව දිස්ත්‍රික් පාර්ලිමේන්තු මන්ත්‍රී ශානකියන් රාසමාණික්කම් සාදරයෙන් පිළිගෙන තිබේ.

තම ‘X’ (ට්විටර්) ගිණුමේ සටහනක් තබමින් මන්ත්‍රීවරයා ප්‍රකාශ කර ඇත්තේ, දයා ගෲප් සමාගම විසින් ඉදිරිපත් කර තිබූ රිට් අයැදුම්පත අභියාචනාධිකරණය විසින් ප්‍රතික්ෂේප කර ඇති බවයි.

අදාළ සමාගම දිගින් දිගටම ණය පැහැරහැර ඇති බවත්, වෙන්දේසි කල්දමා ගැනීම සඳහා බැංකුව සමඟ නැවත නැවතත් සාකච්ඡා පවත්වමින් වසරකුත් මාස අටකට අධික කාලයක් තිස්සේ බැංකුවේ ණය අයකර ගැනීමේ ක්‍රියාවලිය ප්‍රමාද කිරීමට කටයුතු කර ඇති බවත් අධිකරණ තීන්දුවේ සඳහන් වන බව හෙතෙම පෙන්වාදෙයි.

මේ පිළිබඳව වැඩිදුරටත් අදහස් දක්වන ශානකියන් රාසමාණික්කම් මන්ත්‍රීවරයා මෙසේද පවසා ඇත:

“මහජන මුදල් නැවත අයකර ගැනීම සඳහා තැබූ මෙම පියවර මම අගය කරනවා. මම 2021 වර්ෂයේදී මහජන බැංකුවේ තිබූ රුපියල් බිලියන 54ක අකර්මණ්‍ය ණය පිළිබඳව හෙළිදරව් කරමින්, සාමාන්‍ය ජනතාව ණයක් පැහැර හැරූ සැනින් දැඩි පියවර ගන්නා රාජ්‍ය බැංකු, දේශපාලන සබඳතා ඇති මෙවැනි බලවතුන්ට වසර ගණනාවක් තිස්සේ ණය පැහැර හැරීමට ඉඩ දී බලා සිටින්නේ මන්දැයි ප්‍රශ්න කළා.
කෙසේ වෙතත් මෙය එකම එක සිදුවීමක් පමණයි. කෝප් කමිටු වාර්තා මඟින් හෙළිදරව් කළ, විශාල වශයෙන් ණය පැහැර හැර ඇති තවත් බොහෝ බලවතුන් නීතිමය පියවර ගන්නා බව පවසද්දීත් තවමත් නිදැල්ලේ පසුවනවා. සාමාන්‍ය පුරවැසියෙකු කුඩා ණයක් පැහැර හැරියත් ඉතා වේගයෙන් සහ අනුකම්පාවකින් තොරව ක්‍රියාත්මක වන නීතිය, රටේ ඉහළ පෙළේ ධනවත් සහ බලවත් ව්‍යාපාරිකයන්ටත් ඒ සමානවම ක්‍රියාත්මක විය යුතුයි. මහජන මුදල් අයිති මේ රටේ ජනතාවටයි. එබැවින් වගවීම යන්න ණයගැතියා කවුද යන්න මත තීරණය නොවිය යුතුයි.”

මෙම සිදුවීමත් සමඟ මෙරට මහා පරිමාණ ණය පැහැරහරින්නන්ගෙන් රාජ්‍ය බැංකු සතු මුදල් අයකර ගැනීමේ ක්‍රියාවලිය කෙරෙහි සමාජය තුළ නැවතත් දැඩි කතාබහක් නිර්මාණය වී තිබේ.