ක්‍රීඩාශීලී, නිරෝගී ජීවිතයක් ගත කරපු තරුණ පියවරුන් දෙදෙනෙක් දින තුනක් ඇතුළත හදිසියේම මෙලොව හැරගිය අතිශය ශෝකජනක පුවතක් එක්සත් අරාබි එමීර් රාජ්‍යයෙන් (UAE) වාර්තා වෙනවා.

පළමු සිදුවීම වාර්තා වෙන්නේ අජ්මාන් නගරයෙන්. එහි වසර 15ක් තිස්සේ පදිංචිව සිටි, කේරළයේ උපන් 43 හැවිරිදි අන්වර් සාදික් පසුගිය බදාදා රාත්‍රියේ සුපුරුදු පරිදි තම මිතුරන් සමඟ බැඩ්මින්ටන් ක්‍රීඩා කිරීමට ගොස් තිබෙනවා. ක්‍රීඩා කරමින් සිටින අතරතුර ඔහුගේ වම් අතේ හදිසි වේදනාවක් හටගෙන ඇති අතර, ඔහු ක්‍රීඩා පිටියෙන් ඉවත්ව මඳක් විවේක ගෙන තිබෙනවා.

ඉන්පසු ලෙමන් සෝඩා වීදුරුවක් ද පානය කර නිවසට යාම සඳහා රථගාලේ තිබූ තම මෝටර් රථයට ගොඩ වූ අවස්ථාවේදී ඔහු එකවරම සිහිසුන්ව ඇද වැටී තිබෙනවා. මිතුරන් වහාම ගිලන් රථ කැඳවා ප්‍රථමාධාර දුන්නද, රාත්‍රී 9.51ට ඔහු හෘදයාබාධයකින් මියගොස් ඇති බව වෛද්‍යවරුන් තහවුරු කළා. ෂාජා හි ප්‍රසම්පාදන කළමනාකරුවෙකු ලෙස සේවය කළ ඔහු, පාසල් යන දරුවන් දෙදෙනෙකුගේ ආදරණීය පියෙකි. විශේෂත්වය නම් මීට වසර 10කට පෙර ඔහුගේ පියා ද කුවේට් හිදී මියගොස් ඇත්තේ හෘදයාබාධයකින්.

මෙම කඳුළු කතාව නිමවීමටත් පෙර, මීට දින තුනකට පෙර ඩුබායි හි අල් ගර්හවුඩ් ප්‍රදේශයෙන් තවත් මෙවැනිම මරණයක් වාර්තා වුණා. එහිදී තීරණාත්මක ක්‍රිකට් තරඟයක යෙදී සිටි 38 හැවිරිදි සෆ්වාන් ශානු නමැති ඉන්දීය ජාතිකයා, ලකුණු 46ක් ලබා ගනිමින් හයේ පහරවල් 6ක් එල්ල කර සුළු මොහොතකින්, ක්‍රීඩා පිටියේම ඇද වැටී මියගොස් තිබෙනවා. ඔහුට මාස 4ක බිළිඳු දියණියක ඇතුළු කුඩා දරුවන් සිව්දෙනෙකු සිටින බවයි වාර්තා වෙන්නේ.

නිරෝගීව ක්‍රීඩා කරමින් සිටි තරුණයන් මෙලෙස හදිසියේම හෘදයාබාධවලට ලක්වීම මුළු මහත් අරාබි කලාපයම දැඩි කම්පනයකට පත් කර තිබෙනවා.