මැයි 28-31 දක්වා නවදිල්ලි නුවර පැවැත්වීමට සැලසුම් කර තිබූ 4 වැනි ‘ඉන්දු-අප්‍රිකා සංසද සමුළුව’ (India-Africa Forum Summit IV) හදිසියේම කල් දැමීමට පියවර ගැනීමත් සමඟ, ඉන්දියාව සහ අප්‍රිකානු රටවල් අතර පවතින රාජ්‍ය තාන්ත්‍රික සබඳතා කෙරෙහි ජාත්‍යන්තරයේ දැඩි අවධානයක් යොමුව තිබේ.

සමුළුව ආරම්භ වීමට දින කිහිපයකට පෙර ඉන්දියාව සහ අප්‍රිකානු සංගමය ඒකාබද්ධව මෙම තීරණය ගෙන ඇති අතර, ඊට හේතුව ලෙස ඔවුන් දක්වා ඇත්තේ අප්‍රිකානු කලාපයේ මතුව ඇති “මහජන සෞඛ්‍ය තත්ත්වයයි”.

කොංගෝ ප්‍රජාතන්ත්‍රවාදී ජනරජය සහ උගන්ඩාව යන රටවල දැනට පැතිර යන ‘බුන්ඩිබුග්යෝ එබෝලා වෛරස්’ ව්‍යාප්තිය මීට හේතු වී ඇති බව පැහැදිලි වන අතර, අප්‍රිකානු නායකයන්ගේ සහ නියෝජිතයන්ගේ ආරක්ෂාව මෙන්ම ඔවුන්ගේ පූර්ණ සහභාගීත්වය තහවුරු කිරීම වෙනුවෙන් මෙම පියවර ගෙන ඇත.

නිල ප්‍රකාශයන් මෙහිදී තරමක් ප්‍රවේශම් සහගත ස්වරූපයක් ගත්තද, සමුළුවට පැමිණෙන පිරිස අතර වෛරසය ව්‍යාප්ත වීමේ දැඩි බියක් පැවතීම මෙම කල් දැමීමට සෘජුවම බලපා ඇති බව ක්ෂේත්‍රයේ විචාරකයෝ පවසති.

එබෝලා භීතිය හේතුවෙන් ඉහළ පෙළේ රාජ්‍ය තාන්ත්‍රික සාකච්ඡාවලට බාධා එල්ල වුවද, මෙමඟින් තීරණාත්මක එබෝලා එන්නතක් කඩිනමින් නිෂ්පාදනය කිරීම සඳහා ඉන්දියාව දක්වන සක්‍රීය දායකත්වය ලෝකය හමුවේ යළිත් ඔප්පු වී ඇත.

විශේෂයෙන්ම Serum Institute of India ආයතනය හරහා මෙම එන්නත් නිෂ්පාදනය වේගවත් කිරීමට ඉන්දියාව පියවර ගෙන ඇති අතර, මේ හරහා නවදිල්ලිය අප්‍රිකාවට නැතුවම බැරි, හදිසි අවශ්‍යතාවලදී වහාම ක්‍රියාත්මක වන ප්‍රමුඛතම හවුල්කරුවෙකු ලෙස ඉස්මතු වී තිබේ.

ඉන්දියාවේ මෙම මැදිහත්වීම, පසුගිය කොවිඩ්-19 වසංගත සමයේදී ඔවුන් ක්‍රියා කළ ආකාරය ලොවට යළිත් සිහිපත් කරවන්නකි.

එදා කොවිඩ් අර්බුදයේදී ලෝකයේ ප්‍රධානතම එන්නත් නිෂ්පාදනාගාරය බවට පත්වූයේ ඉන්දියාවේ ‘සෙරම්’ (SII) ආයතනයයි.

ඔවුන් විශේෂයෙන්ම අප්‍රිකාව ඇතුළු දකුණු අර්ධගෝලයේ සංවර්ධනය වෙමින් පවතින රටවල් වෙනුවෙන් ඉතා අඩු මිලකට හෝ නිෂ්පාදන පිරිවැයට පමණක් අනුකූලව එන්නත් මාත්‍රා බිලියන ගණනක් සපයමින් ලෝකයටම විශාල සහනයක් සැලසීය.