කම්කරු පක්ෂයේ නායකත්වය ඇන්ඩි බර්න්හැම් වෙත පැවරිය යුතු බවට එම පක්ෂයේ මන්ත්‍රීවරුන්ගෙන් එල්ල වූ දැඩි බලපෑම හමුවේ, බ්‍රිතාන්‍ය අග්‍රාමාත්‍ය කියර් ස්ටාමර් හෙට සිය ධුරයෙන් ඉල්ලා අස්වන බව ප්‍රකාශ කිරීමට නියමිත බව වාර්තා වේ.

ඇන්ඩි බර්න්හැම් යළි පාර්ලිමේන්තුවට තේරී පත් වූ අතුරු මැතිවරණයට පෙර, අග්‍රාමාත්‍යවරයා සහ ඔහුගේ පාර්ශවකරුවන් සති ගණනාවක් තිස්සේ තරයේ කියා සිටියේ බර්න්හැම් හෝ වෙනත් ඕනෑම අයෙකුගෙන් එල්ල වන නායකත්ව අභියෝගයකට මුහුණ දීමට තමන් සූදානම් බවයි.

කෙසේ වෙතත්, ව්‍යාපාරික කටයුතු පිළිබඳ ලේකම් පීටර් කයිල් අද උදෑසන Sky News නාලිකාවට ප්‍රකාශ කළේ, අගමැති ස්ටාමර් මේ වන විට මුහුණ දී සිටින දේශපාලන යථාර්ථය පිළිබඳව ගැඹුරින් සිතා බැලීමට මෙම සති අන්තය වෙන් කර ඇති බවයි.

රජය වෙනුවෙන් අදහස් දැක්වූ කයිල්, ස්ටාමර්ගේ ඉදිරි සැලසුම් මොනවාද යන්න හෝ තමන් අගමැතිවරයාගෙන් කුමක් ඉල්ලා සිටියේද යන්න හෙළි කිරීම ප්‍රතික්ෂේප කළේය.

ස්ටාමර් හෙට දිනයේදී ධුරයෙන් ඉල්ලා අස්වීමට සැලසුම් කර තිබේදැයි විමසූ විට, කයිල් කියා සිටියේ එවැනි තීරණයක් ගැන සිතීමට තමන්ට නිශ්චිත හේතුවක් නොමැති බවයි. නමුත්, “මෙවැනි තීරණාත්මක මොහොතක රටට මුල් තැන දීම යන්නෙන් අදහස් කරන්නේ කුමක්ද” යන්න පිළිබඳව ස්ටාමර් මේ වන විට කල්පනා කරමින් සිටින බව ඔහු පැවසීය.

පසුගිය බ්‍රහස්පතින්දා පැවැති අතුරු මැතිවරණයෙන් බර්න්හැම් ලැබූ විශිෂ්ට ජයග්‍රහණයෙන් පසු, අංක 10 ඩවුනින් වීදියේ (අගමැති නිල නිවසේ) පාලන බලයේ වෙනසක් ඉතා ආසන්න බවට පළ වන මතයන් බැහැර කිරීමට ද ඔහු කටයුතු කළේ නැත.

පසුගිය සිකුරාදා තමන් ස්ටාමර් සමඟ දීර්ඝ ලෙස සාකච්ඡා කළ බව පවසමින් කයිල් මෙසේ ද සඳහන් කළේය: “මා දන්නා පැහැදිලිම දේ තමයි, ඔහු මා ඇතුළු ඉතා විශාල පිරිසක් සමඟ සාකච්ඡා පවත්වමින් සිටින බව සහ මේ සති අන්තයේ ඔහු දැඩි ලෙස වෙහෙස මහන්සි වී වැඩ කරන බව. තමන් මුහුණ දී සිටින දේශපාලන යථාර්ථයන්, අභියෝග සහ අවස්ථාවන් පිළිබඳව ස්වයං විවේචනයක යෙදීමට ඔහු කාලය වෙන් කර තිබෙනවා. මෙවැනි මොහොතක ජනතාව ඔහුගෙන් බලාපොරොත්තු වෙන්නෙත් එයමයි.”

කෙසේ වෙතත්, අගමැති කාර්යාලය ස්ටාමර් ඉල්ලා අස්වීමට සැලසුම් කරන බවට එල්ල වන චෝදනා ප්‍රතික්ෂේප කර ඇති අතර, සිකුරාදා සිට ඔහුගේ ස්ථාවරයේ කිසිදු වෙනසක් සිදුව නොමැති බව ප්‍රකාශ කර ඇත.

එදින මාධ්‍යවේදීන් ඇමතූ ස්ටාමර් කියා සිටියේ, “පැහැදිලිවම කියන්න ඕනේ, යම් හෙයකින් නායකත්ව තරඟයක් ආවොත් මම ඊට ඉදිරිපත් වෙනවා” යනුවෙනි.

එසේම එවැනි නායකත්ව තරඟයක් පැවැත්වීමෙන් මුළු රටම දැඩි දේශපාලන අර්බුදයකට ඇද වැටෙනු ඇති බව ද ඔහු එදින අනතුරු ඇඟවීය.