රජයේ බදු ක්‍රමය සහ ආර්ථික ප්‍රතිසංස්කරණ වැඩපිළිවෙළ දැඩි ලෙස සාධාරණීකරණය කරමින් කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ, විපක්ෂයේ පාර්ලිමේන්තු මන්ත්‍රී හර්ෂ ද සිල්වාට චෝදනා කර තිබේ.

ඔහු පවසන්නේ, ආර්ථිකය විධිමත් කිරීමට සහ බදු පදනම පුළුල් කිරීමට රජය ගන්නා උත්සාහයන්ට එරෙහිව හර්ෂ ද සිල්වා දේශපාලනික ස්ථාවරයක සිට කටයුතු කරන බවයි.

නියෝජ්‍ය අමාත්‍යවරයා නිකුත් කළ නිවේදනයක දැක්වෙන්නේ, දශක ගණනාවක් තිස්සේ ශ්‍රී ලංකාවේ ආර්ථිකය වැඩි වශයෙන් අවිධිමත් මට්ටමක පැවතීම හේතුවෙන් රජයට ආදායම් රැස්කිරීමේ හැකියාව සීමා වූ බවයි.

එහි ප්‍රතිඵලයක් ලෙස බදු ආදායමෙන් සැලකිය යුතු කොටසක් ණය පියවීම සඳහාම වැය කිරීමට සිදුවන මූල්‍ය අර්බුදයක් නිර්මාණය වූ බව ඔහු පෙන්වාදෙයි.

“මුදල් අමාත්‍යාංශය විසින් බදු පදනම පුළුල් කිරීමට සහ අවිධිමත් ආර්ථිකයෙන් මිදීමට ලබා ඇති ප්‍රගතියට එරෙහිව, ඔහු මෙලෙස දේශපාලන ස්ථාවරයක් ගැනීම ඉතා කණගාටුදායක මෙන්ම වෘත්තීය නොවන ක්‍රියාවක්” නියෝජ්‍ය අමාත්‍යවරයා පවසයි.

බදු ආදායම සහ වැට් බද්ද අඩු කිරීම සම්බන්ධයෙන් නියෝජ්‍ය අමාත්‍යවරයා කියාසිටින්නේ, 2025 වසරේදී රජයේ ආදායම දළ දේශීය නිෂ්පාදිතයෙන් 16.7%ක් දක්වා ළඟා වූ බවයි.

එමෙන්ම 2026 වසරේ පළමු කාර්තුව තුළ ආදායම් එකතු කිරීම් නියමිත ඉලක්කයන් සැලකිය යුතු මට්ටමකින් අභිබවා ගොස් ඇති බවද ඔහු අනාවරණය කරයි.

“අපට බදු එකතු කිරීම සඳහා ක්‍රමවත් පද්ධතියක් ඇති වූ විට, බදු අනුපාත ක්‍රමයෙන් අඩු කිරීමට අපට පුළුවන්. උදාහරණයක් ලෙස, ගෝලීය ප්‍රමිතීන්ට අනුකූලව එකතු කළ අගය මත බද්ද අවසානයේදී 10% සිට 12% දක්වා මට්ටමකට අඩුකිරීමට හැකියාව ලැබෙනවා,” යැයි ඔහු සඳහන් කරයි.

විධිමත් ලෙස ආර්ථිකයක් ශක්තිමත් කිරීම තුළින් දේශීය මෙන්ම බාහිර ආර්ථික කම්පනයන්ට ඔරොත්තු දිය හැකි ශක්තිමත් මූල්‍ය වටපිටාවක් නිර්මාණය වන බවද නියෝජ්‍ය අමාත්‍යවරයා මෙහිදී අවධාරණය කරයි.

“මෙහි ආපසු හැරීමක් නැහැ. අභ්‍යන්තර සහ බාහිර කම්පනයන්ට ඔරොත්තු දිය හැකි ශක්තිමත් මූල්‍ය අවකාශයක් අපි ගොඩනගනවා,” යැයි ඔහු පැවසීය.

දේශපාලනයට වඩා ආර්ථික විශ්ලේෂණයන් කෙරෙහි අවධානය යොමුකරන ලෙස හර්ෂ ද සිල්වාගෙන් ඉල්ලා සිටින නියෝජ්‍ය අමාත්‍යවරයා, “සජිත් ප්‍රේමදාසගේ තවත් ස්වරුපයක් නොවී, පෙර සිටි දක්ෂ ආර්ථික විද්‍යාඥයා බවට පත්වන්නැයි මම හර්ෂට ආරාධනා කරනවා,” යැයිද සිය නිවේදනයෙන් වැඩිදුරටත් පවසා තිබේ.