ඉන්දීය අග්‍රාමාත්‍ය නරේන්ද්‍ර මෝදි සහ ප්‍රංශ ජනාධිපති එමානුවෙල් මැක්‍රෝන් අතර ඉතා සුහදශීලී හමුවක් ප්‍රංශයේ නීස් නුවරදී පැවැත්විණි.

එහිදී නායකයන් දෙපළ වැළඳ ගනිමින් සහ අතට අත දෙමින් එකිනෙකා උණුසුම් ලෙස පිළිගත්හ.

දෙරට අතර පැවැත්වෙන ද්විපාර්ශ්වික සාකච්ඡාවලට සහ Bharat Innovates සමුළුව ඒකාබද්ධව ආරම්භ කිරීමට ප්‍රථම ඔවුන් අතර පවතින සුවිශේෂී මිත්‍රත්වය මෙලෙස ප්‍රදර්ශනය විය.

ඉන් අනතුරුව නායකයන් දෙපළ විසින් ඉන්දියාව, ප්‍රංශය ඇතුළු රටවල් රැසක ප්‍රමුඛ පෙළේ නවක ව්‍යවසායකයන් සහ අවදානම් ප්‍රාග්ධන අරමුදල් එකම වහලක් යටට කැඳවන ‘භාරත් ඉනොවේට්ස්’ ගෝලීය සමුළුව නිල වශයෙන් ආරම්භ කරන ලදී.

“මගේ මිත්‍ර ජනාධිපති මැක්‍රෝන්, ඔබව නීස් නුවරදී හමුවීම සතුටක්. අපේ රටවල් දෙක ‘නවෝත්පාදන වසර’ සමරන මෙවැනි කාලයක ‘භාරත් ඉනොවේට්ස්’ සමුළුවට සම්බන්ධ වීම ගැන ඔබට ස්තූතියි,” යනුවෙන් අග්‍රාමාත්‍ය මෝදි ජනාධිපති මැක්‍රෝන් වැළඳගෙන සිටින ඡායාරූපයක් ‘X’ (ට්විටර්) ගිණුමට එක් කරමින් සඳහන් කර තිබුණි.

ජුනි 14 සිට 16 දක්වා දින තුනක් පුරා පැවැත්වෙන මෙම නවෝත්පාදන සමුළුව, ඉන්දීය නව නිපැයුම්කරුවන් ගෝලීය ආයෝජකයන්, ක්ෂේත්‍රයේ ප්‍රමුඛයන් සහ විද්වත් ආයතන සමඟ සම්බන්ධ කරන ප්‍රබල වේදිකාවක් වනු ඇත.

අග්‍රාමාත්‍ය මෝදි සහ ජනාධිපති මැක්‍රෝන් එක්ව මෙම සමුළුව ආරම්භ කිරීම, ඉන්දු-ප්‍රංශ සබඳතාවය තුළ තාක්ෂණයට සහ නවෝත්පාදනයට ලැබෙන ඉහළ වැදගත්කම මැනවින් කියාපාන්නකි.

මෑත වසරවලදී ආරක්ෂක, අභ්‍යවකාශ, ඩිජිටල් තාක්ෂණය සහ කෘත්‍රිම බුද්ධිය (AI) වැනි ක්ෂේත්‍ර ගණනාවක් ඔස්සේ දෙරට අතර සහයෝගීතාවය බෙහෙවින් ශක්තිමත් වී තිබේ.

මෙම වසර මුලදී දෙරටේ සබඳතා ‘විශේෂ ගෝලීය උපායමාර්ගික හවුල්කාරිත්වයක්’ දක්වා ඉහළ නැංවීමෙන් පසුව, නායකයන් දෙපළ අතර පැවැත්වෙන පළමු ද්විපාර්ශ්වික සමුළුව සනිටුහන් වන්නේද මෙම නීස් නුවර සංචාරය අතරතුරදීය.

අග්‍රාමාත්‍ය මෝදි ජුනි 13 සිට 18 දක්වා ප්‍රංශයේ නිල සංචාරයක නිරත වන අතර, ඊට G7 රාජ්‍ය නායක සමුළුව සහ ප්‍රධාන තාක්ෂණික සමුළු කිහිපයකට සහභාගී වීම ඇතුළත් වේ.

ඔහුගේ මෙම නිල සංචාරය නීස්, ඒවියන් සහ පැරිස් යන නගර ත්‍රිත්වය කේන්ද්‍ර කරගනිමින් සංවිධානය කර ඇති අතර, ඊට සමගාමීව ස්ලෝවැකියාවේ කෙටි රාජ්‍ය සංචාරයක නිරත වීමටද නියමිතය.