ජ්‍යෙෂ්ඨ නියෝජ්‍ය පොලිස්පති වරුණ ජයසුන්දරව ත්‍රස්තවාදය වැළැක්වීමේ පනත යටතේ අත්අඩංගුවට ගැනීමට හෝ රැඳවුම් භාරයට ගැනීමට මේ අවස්ථාවේ කිසිදු තීරණයක් ගෙන නොමැති බව නීතිපති දෙපාර්තමේන්තුව අද (12) අභියාචනාධිකරණයට දැනුම්දුන්නේය.

නීතිපතිවරයා වෙනුවෙන් පෙනීසිටි නියෝජ්‍ය සොලිසිටර් ජනරාල් සුහර්ෂි හේරත් මෙම දැනුම්දීම සිදුකළේ වරුණ ජයසුන්දර විසින් ගොනුකර තිබූ රිට් පෙත්සමක් සලකා බැලූ අවස්ථාවේදීය.

2019 පාස්කු ඉරිදා ත්‍රස්ත ප්‍රහාරය සම්බන්ධයෙන් සිදුකෙරෙන විමර්ශනවලට අදාළව තමන්ව අත්අඩංගුවට ගැනීම හෝ රැඳවුම් භාරයට ගැනීම වැළැක්වීමේ නියෝගයක් නිකුත් කරන ලෙස ඉල්ලමින් ජ්‍යෙෂ්ඨ නියෝජ්‍ය පොලිස්පතිවරයා විසින් මෙම පෙත්සම ඉදිරිපත් කර තිබිණි.

ඉදිරිපත් වූ කරුණු සලකා බැලූ අභියාචනාධිකරණය, අදාළ පෙත්සම ලබන බදාදා (17) දින නැවත කැඳවීමට නියෝග කළේය.