පැසිෆික් සාගරය ආශ්‍රිතව ‘එල් නිනෝ’ (El Niño) දේශගුණික තත්ත්වය නිර්මාණය වී ඇති අතර, ඉදිරි මාසවලදී එය තවදුරටත් ප්‍රබල වනු ඇතැයි කාලගුණ විද්‍යාඥයෝ අනතුරු අඟවති.

මධ්‍යම සහ නැගෙනහිර පැසිෆික් සාගර කලාපයේ මුහුදු පෘෂ්ඨයේ උෂ්ණත්වය දිගුකාලීනව ඉහළ යාමේ මෙම සංසිද්ධිය නිල වශයෙන් තහවුරු කිරීමට ඇමෙරිකාවේ ජාතික සාගර සහ වායුගෝලීය පරිපාලනය (NOAA) පියවර ගෙන තිබේ.

මූලාශ්‍ර පවසන පරිදි, 2026 නොවැම්බර් සහ 2027 ජනවාරි අතර කාලයේදී සාගර උෂ්ණත්වය සාමාන්‍ය අගයට වඩා සෙල්සියස් අංශක 2කින් පමණ ඉහළ යාමට 63%ක සම්භාවිතාවක් පවතී.

මෙය ඉතා ප්‍රබල හෝ “සුපිරි” එල් නිනෝ (Super El Niño) තත්ත්වයක් ලෙස හැඳින්වේ.

මෙවැනි තත්ත්වයක් ඇති වුවහොත් එය 2015-2016 කාලයෙන් පසු වාර්තා වන පළමු සුපිරි එල් නිනෝ සිදුවීම වනු ඇත.

එක්සත් ජාතීන්ගේ මහලේකම් අන්තෝනියෝ ගුටරේස් ප්‍රකාශ කළේ, “එල් නිනෝ තත්ත්වය දැනටමත් උණුසුම් වෙමින් පවතින ලෝකයේ ගින්නට පිදුරු දැමීමක් වනු ඇති” බවයි.

බලපෑම් සහ ආර්ථික හානියඑල් නිනෝ සක්‍රීය වීමත් සමඟ ගෝලීය කාලගුණ රටා මුළුමනින්ම වෙනස් වේ.

උතුරු ඇමෙරිකාවේ ශීත සෘතුව වෙනස් වෙද්දී, කැරිබියන් කලාපයට දැඩි නියඟයක්ද, ඉන්දියාව සහ අග්නිදිග ආසියාවට ගිම්හාන මෝසම් වැසි අඩුවීමක්ද අපේක්ෂා කෙරේ.

එසේම, මෙම බලපෑම නිසා 2026 හෝ 2027 වසර ඉතිහාසයේ උණුසුම්ම වසර බවට පත්වීමේ අවදානමක්ද ඇත.

මීට පෙර 1982-83 සහ 1997-98 වසරවල ඇති වූ මෙවැනි තත්ත්වයන් හේතුවෙන් ගෝලීය ආර්ථිකයට ඩොලර් ට්‍රිලියන ගණනක දැවැන්ත ආදායම් අහිමිවීම් සිදු විය.

කෙසේවෙතත්, දේශගුණික විපර්යාස හේතුවෙන් සාගර උණුසුම දැනටමත් ඉහළ ගොස් ඇති බැවින්, මෙවර ඇති විය හැකි නිශ්චිත බලපෑම් පිළිබඳව තවමත් යම් අවිනිශ්චිතතාවක් පවතින බව විද්‍යාඥයෝ පවසති.