රාගම (උතුරු කොළඹ) ශික්ෂණ රෝහලට අනුයුක්තව සේවය කළ හදිසි මරණ පරීක්ෂකවරයකු අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගෙන තිබේ.

සුදර්ශන ශ්‍රී ලාල් ඉන්ද්‍රජිත් දිසානායක නමැති මෙම සැකකරු අත්අඩංගුවට ගෙන ඇත්තේ ගල්කිස්ස ප්‍රදේශයේ පදිංචිකරුවෙකු විසින් කරන ලද පැමිණිල්ලකට අනුවය.

පසුගිය 2025 දෙසැම්බර් 28 වැනිදා රාගම රෝහලේදී මියගිය පුද්ගලයෙකුට අදාළ අධිකරණ වෛද්‍ය වාර්තාවක් නිදහස් කිරීම සඳහා සැකකාර මරණ පරීක්ෂකවරයා විසින් පැමිණිලිකරුගෙන් රුපියල් 100,000ක අල්ලස් මුදලක් ඉල්ලා ඇති බව පැවසේ.

විමර්ශනවලදී හෙළි වී ඇත්තේ, සැකකරු විසින් ඉල්ලා සිටි රුපියල් ලක්ෂයක අල්ලස් මුදල 2026 ජූනි 8 වැනිදා ලබාගෙන මරණ පරීක්ෂණ වාර්තාව භාරදී ඇති බවයි.

ඒ අනුව, අල්ලස් කොමිෂන් සභාව හමුවේ පෙනීසිටීමෙන් අනතුරුව ඔහු අත්අඩංගුවට ගෙන තිබේ.

නීතිවිරෝධී ලෙස මහජන මුදල් ඉල්ලා සිටීම සහ ලබාගැනීම සම්බන්ධයෙන් ඔහුට එරෙහිව චෝදනා ගොනුකර ඇත.

අත්අඩංගුවට ගත් සැකකරු ඉදිරි නීතිමය කටයුතු සඳහා කොළඹ ප්‍රධාන මහේස්ත්‍රාත් අධිකරණය වෙත ඉදිරිපත් කිරීමට නියමිතය.