June 11, 2026
ඉදිරියේදී ඇතිවිය හැකි බවට අනාවැකි පළකර ඇති ප්රබල ‘එල් නිනෝ’ දේශගුණික විපර්යාසය හේතුවෙන් දීර්ඝ නියඟයක් ඇතිවී රටේ ප්රධාන ජල මූලාශ්ර සිඳීගිය හොත්, පානීය අවශ්යතා සඳහා මුහුදු ජලය පිරිසිදු කර බෙදාහැරීමට ශ්රී ලංකාවට සිදුවිය හැකි බව ආපදා කළමනාකරණ මධ්යස්ථානය අනතුරු අඟවයි.
ජනමාධ්ය සාකච්ඡාවකට එක්වෙමින් ආපදා කළමනාකරණ මධ්යස්ථානයේ අතිරේක ලේකම් කේ.ජී.බී. ධර්මතිලක කියාසිටියේ, බලාපොරොත්තු වන මෙම එල් නිනෝ තත්ත්වය මීට පෙර නොවූ විරූ මට්ටමකට ළඟාවිය හැකි අතර, එය රටේ ජල ආරක්ෂණයට බරපතළ තර්ජනයක් එල්ල කරන බවයි.
හදිසි ජල බෙදාහැරීම් කටයුතු සඳහා ජාතික ආපදා සේවා මධ්යස්ථානය සතුව දැනට පවතින්නේ සීමිත ජල බවුසර් සංඛ්යාවක් පමණක් බව පෙන්වාදුන් අතිරේක ලේකම්වරයා, මේ සඳහා සූදානම් වීමේ පියවරයන් රට තුළ කඩිනමින් ශක්තිමත් කළ යුතු බව ද අවධාරණය කළේය.
දීර්ඝ කාලීන වියළි කාලගුණික තත්ත්වයක් ඇති වුවහොත් දැනට පවතින සම්පත් ප්රමාණවත් නොවිය හැකි බවට හෙතෙම අනතුරු ඇඟවීය.
“මේ එල් නිනෝ තත්ත්වය නිසා ජල මූලාශ්ර සම්පූර්ණයෙන්ම සිඳීයන්න පුළුවන්. එහෙම වුණොත් ජලය ලබාගන්න කිසිම මූලාශ්රයක් ඉතිරි වෙන්නේ නැහැ. අපිට මුහුදු ජලය පිරිසිදු කරලා බෙදාහරින්න පවා සලකා බලන්න සිදුවෙන්න පුළුවන්” යැයි ඔහු පැවසීය.
ඔහු මෙම අදහස් පළකළේ, දශකයකට පසු ඇතිවන ප්රබලම එල් නිනෝ තත්ත්වය මෙය විය හැකි බවට එක්සත් ජාතීන්ගේ කාලගුණ විද්යා ඒජන්සිය ද අනතුරු අඟවා ඇති පසුබිමකය.
මේ අතර, පවතින දේශගුණික රටාව හේතුවෙන් වර්ෂාපතනය සැලකිය යුතු ලෙස පහත වැටෙනු ඇතැයි අපේක්ෂා කරන බැවින්, ජූලි සහ අගෝස්තු මාසවලදී වියළි කාලගුණික තත්ත්වයක් පවතිනු ඇති බවට ශ්රී ලංකා කාලගුණ විද්යා දෙපාර්තමේන්තුව ද අනාවැකි පළකර තිබේ.
වර්ෂාපතනය අඩුවීම හේතුවෙන් රට පුරා පානීය ජල සැපයුමට මෙන්ම කෘෂිකාර්මික කටයුතුවලට ද දැඩි බාධා එල්ල විය හැකි බව බලධාරීහු වැඩිදුරටත් අනතුරු අඟවති.
