රාජ්‍ය මූල්‍ය අවභාවිත කිරීමේ චෝදනාවක් සම්බන්ධයෙන් අත්අඩංගුවට ගනු ලැබූ හිටපු අමාත්‍ය විමල් වීරවංශගේ මාධ්‍ය ලේකම්වරයා ලෙස කටයුතු කළ ප්‍රකට ජනමාධ්‍යවේදී ප්‍රසාද් මංජු ලබන 24 වැනිදා දක්වා රක්ෂිත බන්ධනාගාරගත කිරීමට කොටුව මහේස්ත්‍රාත් පසන් අමරසේන අද (10) නියෝග කළේය.

අදාළ චෝදනාවට අනුව, සැකකාර ජනමාධ්‍යවේදියාට තම තනතුරට අදාළව නිල වාහනයක් හෝ ඉන්ධන දීමනාවක් ලබාගැනීමට නීත්‍යානුකූලව හිමිකම තිබී ඇත.

කෙසේවෙතත්, තමන්ට නිල වාහනයක් අවශ්‍ය නොවන බව ප්‍රකාශ කර ඇති ඔහු, පසුව වාහනයක් භාවිත නොකරමින්ම ඉන්ධන සහ අනෙකුත් දීමනා වශයෙන් රුපියල් ලක්ෂ 31 කට අධික (රු. 3,100,000+) මහජන මුදලක් වංචනික ලෙස ලබාගෙන අවභාවිත කර ඇති බව විමර්ශනවලදී හෙළි වී තිබේ.

මෙම මූල්‍ය වංචාව සම්බන්ධයෙන් සිදුකළ දීර්ඝ විමර්ශනවලින් අනතුරුව සැකකරු අත්අඩංගුවට ගෙන අධිකරණයට ඉදිරිපත් කිරීමෙන් පසු මහේස්ත්‍රාත්වරයා විසින් මෙම රිමාන්ඩ් නියෝගය නිකුත් කරනු ලැබීය.