June 10, 2026
එල්.ටී.ටී.ඊ. සංවිධානය ප්රවර්ධනය කෙරෙන කිසිදු ක්රියාකාරකමකට රජය ඉඩ නොතබන බව මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල ඊයේ (9) පාර්ලිමේන්තුවේදී පැවසීය.
කෙසේවුවද, යුද ගැටුම් හේතුවෙන් මියගිය තම ඥාතීන් සිහිපත් කිරීම සඳහා ජනතාවට ඉඩකඩ සලසා දී ඇති බව ද අමාත්යවරයා සඳහන් කළේය.
කිළිනොච්චිය ප්රදේශයේදී, එල්.ටී.ටී.ඊ. සංවිධානය විසින් ගායනා කරන ලද ගීතයක් ෆේස්බුක් සමාජ මාධ්ය ජාලයට මුදාහැරීමට සම්බන්ධයෙන් පුද්ගලයකු අත්අඩංගුවට ගෙන ඇති බව ඇමැති විජේපාල පැවසීය.
මේ සම්බන්ධයෙන් පොලිස්පතිවරයා ඊයේ පස්වරුවේ නීතිපතිවරයා සමඟ සාකච්ඡාවක් පැවැත්වූ බවත්, ඒ අනුව ඉදිරියේදී සුදුසු පියවර ගැනීමට අපේක්ෂා කරන බවත් ඔහු වැඩිදුරටත් ප්රකාශ කළේය.
“එල්.ටී.ටී.ඊ. සංවිධානය ප්රවර්ධනය කරන ක්රියාකාරකම්වලට කිසිදු ඉඩක් තබන්නේ නැති බව අපි මේ සභාවේදී නැවත නැවතත් ප්රකාශ කර තිබෙනවා. හැබැයි, මියගිය තම ඥාතීන් සිහිපත් කිරීමට ජනතාවට අවස්ථාව තිබෙනවා,” යැයි අමාත්යවරයා සඳහන් කළේය.
පොලිසිය සහ නීතිපති දෙපාර්තමේන්තුව අතර පැවැත්වෙන සාකච්ඡාවලින් අනතුරුව, මෙම ගැටලුව සම්බන්ධයෙන් සුදුසු පියවර ගැනීමට රජය බලාපොරොත්තු වන බව ද අමාත්යවරයා වැඩිදුරටත් කියාසිටියේය.
