කොටිකාවත්ත ප්‍රදේශයේ සිදුකළ වැටළීමකදී මුහුණත වටිනාකම ඇමෙරිකානු ඩොලර් 700,000ක් (ලක්ෂ හතක්) වන ව්‍යාජ ඩොලර් 100 නෝට්ටු මිටි 60ක් සමඟ 53 හැවිරිදි ශ්‍රී ලාංකික කාන්තාවක මධ්‍යම අපරාධ විමර්ශන කාර්යාංශය විසින් අත්අඩංගුවට ගෙන තිබේ.

ව්‍යාජ මුදල් ජාවාරමක් සම්බන්ධයෙන් ක්‍රියාත්මක වූ විමර්ශනයකට අනුව, අද (08) අලුයම සැකකාරියගේ නිවසේදී මෙම අත්අඩංගුවට ගැනීම සිදුකර ඇත.

පොලිසිය ප්‍රකාශ කළේ අත්අඩංගුවට ගත් මෙම ව්‍යාජ මුදල් තොගයේ ශ්‍රී ලංකා රුපියල් වටිනාකම රුපියල් මිලියන 210කට ආසන්න වන බවයි.

මෙම ව්‍යාජ මුදල් නෝට්ටු විදේශ රටක මුද්‍රණය කර මෙරටට හොර රහසේ රැගෙන එන්නට ඇති බවට විමර්ශකයෝ සැක කරති.

මෙම ජාවාරම සඳහා පකිස්ථානු ජාතිකයෙකු ද සම්බන්ධ වී ඇති බවට විශ්වාස කරන අතර, ඔහු පිළිබඳව ද දැනට විමර්ශන ආරම්භ කර ඇති බව පොලිසිය වැඩිදුරටත් අනාවරණය කළේය.

පොලිස් වාර්තාවලට අනුව, සැකකරුවන් මෙම ව්‍යාජ ඇමෙරිකානු ඩොලර් නෝට්ටු භාවිත කරමින් දේශීය ව්‍යාපාරිකයන් මුළාකිරීමට උත්සාහ කර ඇති අතර, එක් ඇමෙරිකානු ඩොලරයක් රුපියල් 284 බැගින් වූ අනුපාතයකට මාරුකිරීමට ද සූදානම්ව සිට ඇත.

අත්අඩංගුවට ගත් සැකකාරිය හෙට (09) කොළඹ කොටුව අංක 8 මහේස්ත්‍රාත් අධිකරණය වෙත ඉදිරිපත් කිරීමට නියමිතය.

මෙම ව්‍යාජ මුදල් ජාවාරමට සම්බන්ධ සෙසු පුද්ගලයන් හඳුනාගැනීම සඳහා පොලිසිය වැඩිදුර විමර්ශන සිදුකරයි.