අතුරුදන් වූ ඇමෙරිකානු ඩොලර් මිලියන 2.5ක මුදල සම්බන්ධයෙන් භාණ්ඩාගාරය සකස් කළ වාර්තාව පරික්ෂාවට ලක්කිරීම සඳහා මුදල් අමාත්‍යාංශයේ ලේකම් හර්ෂණ සූරියප්පෙරුම රජයේ මුදල් පිළිබඳ කාරක සභාව (CoPF) හමුවට කැඳවා තිබේ.

මුදල් අමාත්‍යාංශය විසින් පිටු 100කට ආසන්න මෙම වාර්තාව පාර්ලිමේන්තුව වෙත එවා ඇති අතර, එහි පිටපත් රජයේ මුදල් පිළිබඳ කාරක සභාවේ සියලුම සාමාජිකයන් වෙත ලබාදීමට කටයුතු සූදානම් කරමින් පවතින බව එහි සභාපති, සමගි ජන බලවේග පාර්ලිමේන්තු මන්ත්‍රී හර්ෂ ද සිල්වා පවසයි.

මෙම වාර්තාවේ අන්තර්ගත කරුණු පිළිබඳව ඉදිරි පියවර ගැනීම සඳහා හෙට (8) රැස්වන කාරක සභාව හමුවේ පෙනීසිටින ලෙස සූරියප්පෙරුමට දැනුම් දී ඇත.

ශ්‍රී ලංකා භාණ්ඩාගාරයට අයත් ඇමෙරිකානු ඩොලර් මිලියන 2.5ක මුදලක් වංචනික පාර්ශ්වයක් වෙත මාරුකිරීමේ සිදුවීම සම්බන්ධයෙන් මතු වූ ප්‍රශ්නවලට පිළිතුරු දීම සඳහා මුදල් අමාත්‍යාංශයේ සහ මහ බැංකුවේ ජ්‍යෙෂ්ඨ නිලධාරීන් පිරිසක් සමඟ සූරියප්පෙරුම පළමු වරට පසුගිය අප්‍රේල් 30 වැනිදා මෙම කාරක සභාව හමුවේ පෙනීසිටියේය.

මේ අතර, මෙම අතුරුදන් වූ අරමුදල් සම්බන්ධයෙන් වන නඩු විභාගය මෙති පියවරක් ලෙස මේ සතියේ කොළඹ කොටුව මහේස්ත්‍රාත් පසන් අමරසේන හමුවේ කැඳවූ අවස්ථාවේදී, විමර්ශන නිලධාරීන් අධිකරණයට දන්වා සිටියේ මෙම සිදුවීමට අදාළව පුද්ගලයන් 42 දෙනෙකුගෙන් මේ වන විට ප්‍රකාශ සටහන් කරගෙන ඇති බවයි.