උතුරු නයිජර් රාජ්‍යයට අයත් සහරා කාන්තාර කලාපයේදී ඔවුන් ගමන් ගත් ලොරි රථය කාර්මික දෝෂයකට ලක්වී, දින ගණනාවක් අතරමංව සිටීම හේතුවෙන් අධික පිපාසය නිසා පුද්ගලයන් 49 දෙනෙකුට වඩා ජීවිතක්ෂයට පත්ව ඇති බව එරට බලධාරීහු ප්‍රකාශ කරති.

මියගිය පිරිස සියලු දෙනාම නයිජර් ජාතිකයන් වන අතර, ඔවුන් මාලි රාජ්‍යයේ පැවැති ආගමික උත්සවයකට සහභාගී වී නැවත මෙලෙස තම මව්බිම බලා පැමිණෙමින් සිට ඇත.

මාලි සහ ඇල්ජීරියානු සීමාවන්ට ආසන්නව පිහිටි අසාමකා (Assamaka) නගරයට බටහිරින් කිලෝමීටර් 80 කට වඩා දුරින් පිහිටි පාළු ප්‍රදේශයකදී මෙම ලොරි රථය ධාවනය අඩාල වී නතර වී ඇති බව නයිජර් හි අගාඩෙස් (Agadez) කලාපීය ආණ්ඩුකාර කාර්යාලය නිල නිවේදනයක් නිකුත් කරමින් කියාසිටියි.

මෙම අනතුරින් දිවි ගලවාගැනීමට සමත් වී ඇත්තේ පුද්ගලයන් දෙදෙනකු පමණි.

ඔවුන් ජල උල්පතක් සොයා කිලෝමීටර් 50 කට වඩා (සැතපුම් 31) දුරක් පා ගමනින් ගොස්, පසුව අසාමකා නගරය වෙත ළඟා වී එහි සිටි බලධාරීන්ට මේ පිළිබඳව දැනුම් දී තිබේ.

අගාඩෙස් කලාපීය ආණ්ඩුකාර ජෙනරාල් ඊබ්‍රා බූලමා ඉස්සා (Gen. Ibra Boulama Issa) විසින් සිද්ධිය වූ ස්ථානයට යැවූ නියෝජිත කණ්ඩායමක් අනාවරණය කරගෙන ඇත්තේ, මෙම ලොරි රථය නයිජර් දේශසීමාවේ සිට කිලෝමීටර් 300 ක් පමණ ඈතින් පිහිටි මාලි රාජ්‍යයේ තල්හන්දෙක් (Talhandek) නගරයේ සිට දින කිහිපයක සිට ගමන් කරමින් තිබූ එකක් බවයි.

ලොරි රථය කාර්මික දෝෂයකට ලක්වීමට හේතුව හෝ මගීන් කොපමණ කාලයක් එහි බලා සිටියේද යන්න මෙතෙක් නිශ්චිතවම අනාවරණය වී නොමැත.

“සිද්ධිය වූ ස්ථානය පරීක්ෂා කිරීමේදී දැකගත හැකි වූ දර්ශන අතිශය සංවේදී සහ කණගාටුදායකයි. ක්‍රියාවිරහිත වූ ලොරි රථය යට සහ ඒ අවට තිබී අප්‍රාණික සිරුරු දස ගණනාවක් සොයාගැනීමට හැකිවුණා” යැයි අගාඩෙස් ආණ්ඩුකාර කාර්යාලය සඳහන් කර ඇත.

ආණ්ඩුකාර කාර්යාලය විසින් ප්‍රසිද්ධ කරන ලද ඡායාරූපවලින් දැක්වෙන්නේ කාන්තාරය පුරා විසිරී තිබූ මළසිරුරු සහ ඒවා අවට විසිරී තිබූ ඇඳුම් කැබලි මෙන්ම ඔවුන් සතු බඩු බාහිරාදියයි.

“ජලය නොමැතිකම සහ රියදුරු, ඔහුගේ සහායකයා මෙන්ම මගීන් දැඩි උත්සාහයක් ගත්තද වාහනය අලුත්වැඩියා කිරීමට නොහැකි වීම නිසා, මෙම සංචාරකයන් පිරිස අතිශය කර්කශ පරිසරයක සිරවී තිබෙනවා. මෙවැනි අධික උෂ්ණත්වයක් පවතින සහ කිසිදු ජල මූලාශ්‍රයක් නොමැති පරිසරයක ජීවිතය බේරා ගැනීම අතිශය දුෂ්කර” බව එම නිවේදනයේ වැඩිදුරටත් දැක්වේ.