මැදපෙරදිග කලාපයේ පවතින දැඩි නොසන්සුන්කාරී තත්ත්වය හේතුවෙන් ඇති වී තිබෙන බලපෑම් හමුවේ, මෙරට දෛනික ඩීසල් පරිභෝජනය තවත් මෙට්‍රික් ටොන් 500කින් අඩු කරගැනීමේ හදිසි අවශ්‍යතාවක් පවතින නමුත් රජය ඒ සඳහා මෙතෙක් ස්ථිර පියවරක් තීරණය කර නොමැති බව වාර්තා වේ.

ලෝක වෙළෙඳපොළේ ඉන්ධන මිල ඉහළ යාම හේතුවෙන් සෙසු රටවල් මෙන්ම ශ්‍රී ලංකාව ද මේ වන විට දැඩි ආර්ථික දුෂ්කරතාවලට මුහුණ දී සිටියි.

විදුලිබල හා බලශක්ති අමාත්‍ය අරුණ කරුණාතිලක උපුටා දක්වමින් ‘ඩේලි මිරර්’ පුවත්පත වාර්තා කර ඇත්තේ QR කේත ක්‍රමවේදය යටතේ ඉන්ධන බෙදාහැරීම විධිමත් කිරීමෙන් පසුව මෙරට දෛනික ඩීසල් පරිභෝජනය සාමාන්‍යයෙන් මෙට්‍රික් ටොන් 4,200ක් දක්වා අඩු වී ඇති බවයි.

කෙසේ වෙතත්, රටේ විදේශ විනිමය ඉතිරි කරගැනීම සඳහා එම ප්‍රමාණය තවත් ටොන් 500කින් පමණ අවම කරගත යුතු බව ඔහු පෙන්වා දෙයි.

එහෙත්, එම ඉලක්කය සපුරා ගැනීම සඳහා රජය මෙතෙක් නිශ්චිත ක්‍රියාමාර්ගයක් ස්ථිර වශයෙන් තීරණය කර නොමැති බව ද අමාත්‍යවරයා වැඩිදුරටත් සඳහන් කර ඇත.

මැදපෙරදිග යුදමය වාතාවරණය හේතුවෙන් ලෝක වෙළෙඳපොළේ බොරතෙල් මිල ශීඝ්‍රයෙන් ඉහළ යාම නිසා ශ්‍රී ලංකාවේ මාසික ඉන්ධන ආනයන වියදම මේ වන විට ඇමෙරිකානු ඩොලර් මිලියන 500 ඉක්මවා ගොස් ඇත. මේ හේතුවෙන් රටේ පවතින විදේශ විනිමය සංචිත කෙරෙහි දැඩි බලපෑමක් එල්ල වී තිබේ.