අඟුරුවාතොට, බටගොඩ ප්‍රදේශයේ පිහිටි වැඩිහිටි නිවාසයක හටගත් ගින්නකින් පුද්ගලයන් අටදෙනකුට වැඩි පිරිසක් ජීවිතක්ෂයට පත්ව ඇති බව පොලිසිය පවසයි.

පොලිස් මාධ්‍ය අංශයට අනුව, ගින්න නිවා දැමීමෙන් පසු එම ස්ථානයෙන් 8 දෙනෙකුට වැඩි පිරිසකගේ මළසිරුරු මේ වන විට සොයාගෙන ඇත.

මෙම අනතුරින් තුවාල ලැබූ තවත් පුද්ගලයන් අටදෙනෙකු ප්‍රතිකාර සඳහා රෝහල්ගත කර ඇති අතර, ආපදා සහන කණ්ඩායම් සහ ප්‍රදේශවාසීන් එක්ව එහි සිටි අනෙක් නේවාසිකයන් 51 දෙනකු නිරුපද්‍රිතව බේරා ගැනීමට සමත්ව තිබේ.

ගින්න හට ගැනීමට හේතුව මෙතෙක් අනාවරණය වී නොමැති අතර, ඒ පිළිබඳව සෙවීම සඳහා පොලිසිය පුළුල් විමර්ශනයක් ආරම්භ කර ඇත.

මියගිය පුද්ගලයන් කවුද යන්න සහ සිද්ධියට අදාළ වැඩිදුර තොරතුරු මෙතෙක් නිල වශයෙන් ප්‍රකාශයට පත්කර නොමැත.

මෑත ඉතිහාසය තුළ මෙරට රැකවරණ මධ්‍යස්ථානයක සිදු වූ දරුණුතම සහ ඛේදනීයම අනතුරක් ලෙස මෙය වාර්තා වන අතර, ආරක්ෂක අංශ සහ සහන සේවා නිලධාරීන් එක්ව එම ස්ථානයේ තවදුරටත් සෙවුම් සහ මුදාගැනීමේ කටයුතු සිදුකරමින් පවතියි.