ජපානයේ කවගෝයි (Kawagoe) නගරයේ ඉදිකර ඇති මුස්ලිම් පල්ලියක් එරට පළාත් පාලන නීති සහ රෙගුලාසි සම්පූර්ණයෙන්ම උල්ලංඝනය කරමින්, නිසි බලධාරීන්ගේ අවසරයකින් තොරව ඉදිකර ඇති බව ජපන් බලධාරීන් විසින් අනාවරණය කරගෙන තිබේ. මෙම ආන්දෝලනාත්මක හෙළිදරව්වත් සමඟ ජපානයේ පිහිටි පාකිස්ථාන තානාපති කාර්යාලය අදාළ පල්ලි ව්‍යාපෘතිය සමඟ පැවති සියලු සබඳතාවලින් වහාම ඉවත් වීමට පියවර ගෙන ඇත.

සයිටමා ප්‍රාන්තයට (Saitama Prefecture) අයත් කවගෝයි හි පිහිටි මෙම මුස්ලිම් පල්ලිය, වර්ග මීටර් 4,500ක විශාල භූමි භාගයක ඉදිකර තිබේ. කෙසේ වෙතත්, දේපළ වාර්තාවලට අනුව අදාළ ඉඩම නිල වශයෙන් වර්ග කර ඇත්තේ “කඳුකර වනාන්තර බිමක්” (Mountain forest land) ලෙසය. ජපන් නීතියට අනුව මෙම ප්‍රදේශය නාගරික සංවර්ධන පාලන කලාපයකට (Urbanisation control area) අයත් වන බැවින්, පළාත් පාලන ආයතනවල විශේෂ අවසරයකින් තොරව එහි කිසිදු ගොඩනැඟිල්ලක් ඉදිකිරීම සපුරා තහනම් වේ.

ජපානයේ ප්‍රමුඛ සහ කීර්තිමත් පුවත්පතක් වන ‘දි අසහී ෂිම්බුන්’ (The Asahi Shimbun) වාර්තා කරන අන්දමට, අදාළ දේපළ වාර්තා පරීක්ෂා කිරීමේදී හෙළි වී ඇත්තේ පසුගිය 2025 මාර්තු මාසයේදී මෙම ඉඩමේ හිමිකාරීත්වය වෙනස් වී ඇති බවයි. එහිදී ‘ෆුජිමි’ හි පිහිටි දේපළ වෙළඳාම් සමාගමක සිට කවගෝයි හි ලියාපදිංචි සමාගමක් වෙත මෙම ඉඩම පවරා දී ඇත.

කවගෝයි නගර සභාවේ උසස් නිලධාරීන් මේ පිළිබඳව නිල වශයෙන් තහවුරු කර සිටින්නේ, මෙම මුස්ලිම් පල්ලිය ඉදිකිරීම සඳහා නීත්‍යානුකූලව ලබාගත යුතු කිසිදු පූර්ව අනුමැතියක් හෝ අවසර පත්‍රයක් (Clearance) ලබාගෙන නොමැති බවයි. ඒ අනුව ඉදිරියේදී මෙම නීති විරෝධී ඉදිකිරීම සම්බන්ධයෙන් දැඩි ක්‍රියාමාර්ග ගැනීමට ජපන් බලධාරීන් සූදානම් වන බව ද වාර්තා වේ.