June 3, 2026
අභියාචනාධිකරණ සහ ශ්රේෂ්ඨාධිකරණ විනිසුරුවරුන්ගේ විශ්රාම ගැන්වීමේ වයස් සීමාව දීර්ඝ කිරීමට රජය දරන උත්සාහයට සිය දැඩි විරෝධය පළ කරමින් සමගි ජන බලවේගය නිවේදනයක් නිකුත් කර තිබේ. එවැනි පියවරක් මඟින් ආණ්ඩුක්රම ව්යවස්ථාව සහ අධිකරණයේ ස්වාධීනත්වය බිඳ වැටෙනු ඇති බවට ද එම පක්ෂය එහිදී අනතුරු අඟවා ඇත.
උත්තරීතර අධිකරණයේ විනිසුරුවරුන්ගේ විශ්රාම ගැන්වීමේ වයස් සීමාව ආණ්ඩුක්රම ව්යවස්ථාව මඟින්ම නියම කර ඇති බැවින්, එය වෙනස් කළ හැක්කේ ව්යවස්ථා සංශෝධනයක් මඟින් පමණක් බව පෙන්වා දෙන සමගි ජන බලවේගය, මෙම යෝජනාව සම්බන්ධයෙන් රජය කිසිදු පැහැදිලි කිරීමක් කර නොමැති බවට ද ප්රකාශ කළේය. මෙම අපැහැදිලි තත්ත්වය හේතුවෙන් මහජනතාව තුළ දැඩි සැකයක් මතුව ඇති බව ද එම පක්ෂය පවසයි.
නව ආණ්ඩුක්රම ව්යවස්ථාවක් කෙටුම්පත් කර එය ජනමත විචාරණයකින් ජනතාවගේ අනුමැතිය සඳහා ඉදිරිපත් කරන බවට රජය සිය ප්රතිපත්ති ප්රකාශයෙන් ප්රතිඥා දී තිබූ බව පෙන්වා දෙන එම පක්ෂය ව්යවස්ථා සංශෝධනවලට එරෙහිව මීට පෙර ආණ්ඩු පක්ෂය දැරූ ස්ථාවරයන්ට මෙම නව උත්සාහය සම්පූර්ණයෙන්ම පටහැනි බවට චෝදනා කරයි.
එම නිවේදනයට අනුව, විශ්රාම ගැන්වීමේ වයස දීර්ඝ කිරීම මඟින් සුදුසුකම් ලත් අනෙකුත් විනිසුරුවරුන්ගේ උසස්වීම් අසාධාරණ ලෙස ප්රමාද වන අතර, අන් අයගේ අයිතිවාසිකම් සහ නිදහසට ගරු කළ යුතු බව දැක්වෙන ආණ්ඩුක්රම ව්යවස්ථාවේ 28 වැනි වගන්තිය ද එමඟින් උල්ලංඝනය වේ. මෙම යෝජනාව නීතියේ ආධිපත්යයට සහ අධිකරණයේ ස්වාධීනත්වයට එල්ල කරන සෘජු අභියෝගයක් බව සජබය තර්ක කරයි.
අධිකරණය සුරැකීම වෙනුවෙන් පෙනී සිටින සියලුම පුද්ගලයන්, සංවිධාන සහ දේශපාලන පක්ෂවලින් සමගි ජන බලවේගය ඉල්ලා සිටින්නේ රජයේ මෙම පියවරට එරෙහිව මැදිහත් වන ලෙසයි. මේ වන විටත් ශ්රී ලංකා නීතිඥ සංගමය මෙම ගැටලුව සම්බන්ධයෙන් ජනාධිපතිවරයා වෙත ලිඛිතව දැනුම් දී ඇති ස්ථාවරය අනුමත කරන බව ප්රකාශ කරන සමගි ජනබලවේගය මෙම යෝජනාව වහාම ඉල්ලා අස්කර ගන්නා ලෙස රජයෙන් ඉල්ලා සිටී.
