2024 සහ 2025 වසරවලදී අන්තර්ජාතික ක්‍රීඩා ජයග්‍රහණ අත්කරගත් ක්‍රීඩක ක්‍රීඩිකාවන් සහ පුහුණුකරුවන් වෙනුවෙන් රුපියල් මිලියන 61.38ක මූල්‍ය දිරිගැන්වීම් පිරිනැමීමට තරුණ කටයුතු හා ක්‍රීඩා අමාත්‍යාංශය අඟහරුවාදා (02) පියවර ගත්තේය.

තරුණ කටයුතු හා ක්‍රීඩා අමාත්‍ය සුනිල් කුමාර ගමගේ ගේ ප්‍රධානත්වයෙන්, අමාත්‍යාංශයේ සහ ක්‍රීඩා ක්ෂේත්‍රයේ ජ්‍යෙෂ්ඨ නිලධාරීන්ගේ සහභාගීත්වයෙන් පැවැති උත්සවයකදී ක්‍රීඩක ක්‍රීඩිකාවන් 37 දෙනකු වෙත මෙම සම්මාන පිරිනමන ලදී.

ජපානයේ පැවැති 2024 ලෝක පැරා මලල ක්‍රීඩා ශූරතාවලිය, 2024 පැරිස් පැරාලිම්පික් උළෙල, ඉන්දියාවේ පැවැති 2025 ලෝක පැරා මලල ක්‍රීඩා ශූරතාවලිය සහ බහරේනයේ පැවැති 2025 ආසියානු තරුණ ක්‍රීඩා උළෙල යන තරඟාවලිවලදී විශිෂ්ට දක්ෂතා දැක්වූ ක්‍රීඩක ක්‍රීඩිකාවන් සහ පුහුණුකරුවන් වෙත මෙම මූල්‍ය ත්‍යාග පිරිනැමිණි.

ත්‍යාගලාභීන් අතරින්, පැරිස් පැරාලිම්පික් උළෙලේ පිරිමි හෙල්ල විසිකිරීමේ ඉසව්වෙන් රිදී පදක්කම දිනාගත් කේ.ඒ. සමිත දුලාන්, රුපියල් මිලියන 15ක ඉහළම තනි පුද්ගල මූල්‍ය ත්‍යාගය හිමිකර ගත්තේය.

එමෙන්ම බහරේනයේ පැවැති ආසියානු තරුණ ක්‍රීඩා උළෙලේ මීටර් 1,500 ඉසව්වෙන් රන් පදක්කම දිනාගත් ජී.එල්. ළහිරු අචින්ත ක්‍රීඩකයා රුපියල් මිලියන 5ක මූල්‍ය ත්‍යාගයක් ලබාගත්තේය.

මෙම දිරිගැන්වීමේ වැඩසටහන, රජයේ “Mission Olympic 2028” (ඔලිම්පික් මෙහෙයුම 2028) වැඩසටහන ඇතුළු ඉදිරි තරඟාවලිවලදී ඉහළ අන්තර්ජාතික ජයග්‍රහණ කරා ක්‍රීඩකයන් මෙහෙයවීම සහ දක්ෂතා සපිරි ක්‍රීඩක ක්‍රීඩිකාවන් මෙන්ම පුහුණුකරුවන් වෙනුවෙන් පවතින උපකාරක පද්ධතිය ශක්තිමත් කිරීමේ පුළුල් ප්‍රයත්නයක කොටසක් ලෙස ක්‍රියාත්මක වේ.