ශ්‍රී ලංකාව තුළ මෙතෙක් සොයාගෙන ඇති, එම වර්ගයේ පළමු අවිය ලෙස සැලකෙන, මෙරට නිෂ්පාදිත ‘මිනි උසි’ (Mini Uzi) මාදිලියේ ස්වයංක්‍රීය ගිනිඅවියක් කොළඹ පිහිටි පොදු සුසාන භූමියකින් සොයාගැනීමට පොලිසිය සමත්ව තිබේ.

ඩුබායි රාජ්‍යයෙන් පිටුවහල් කිරීමෙන් පසු මෑතකදී මෙරටට පැමිණි අවස්ථාවේදී අත්අඩංගුවට ගෙන, දැනට මධ්‍යම අපරාධ විමර්ශන කාර්යාංශය (CCIB) භාරයේ රඳවා තබාගෙන සිටින “මහවත්තේ චාමර” නමැති පාතාල කල්ලි සාමාජිකයාගෙන් ප්‍රශ්න කිරීමේදී අනාවරණය වූ තොරතුරු මත ක්‍රියාත්මක කළ මෙහෙයුමකදී මෙම අවිය සොයාගෙන ඇත.

මෙම සෝදිසි කිරීමේදී සුසාන භූමිය තුළ සඟවා තිබූ විදේශීය රටක නිෂ්පාදිත පිස්තෝලයක්, මැගසින් එකක් සහ පතොරම් තුනක් ද නිලධාරීන් විසින් සොයාගෙන තිබේ.

විමර්ශකයන් විසින් තහවුරු කරගෙන ඇත්තේ මෙම ‘මිනි උසි’ මාදිලියේ ගිනිඅවිය දේශීයව නිෂ්පාදනය කරන ලද්දක් බවයි. මීට පෙර මෙවැනි ආයුධ රට තුළ පවතින බවට බුද්ධි තොරතුරු මඟින් අනාවරණය වී තිබුණ ද, ශ්‍රී ලංකාවේ කිසිදු නීතිය ක්‍රියාත්මක කරන ආයතනයක් විසින් මෙවැනි අවියක් සොයාගත් පළමු අවස්ථාව මෙය බව පොලිසිය පවසයි.

සිද්ධිය සම්බන්ධයෙන් ඉදිරි විමර්ශන ක්‍රියාත්මකය.