අහමදාබාද්හි නරේන්ද්‍ර මෝදි ක්‍රීඩාංගණයේදී ගුජරාට් ටයිටන්ස් කණ්ඩායමට එරෙහිව පැවැති 2026 IPL අවසාන මහා තරගය අතරතුරදී පිටියේ විනිසුරු නිතින් මෙනන් දෙසට අයිස් බෑගයක් ප්‍රහාරාත්මක ලෙස දමා ගැසීමේ වරදට රෝයල් චැලෙන්ජර්ස් බැංගලෝර් (RCB) කණ්ඩායමේ ටිම් ඩේවිඩ් සඳහා තරගයක තහනමක් පනවා තිබේ.

ඒ අනුව ඔහුට 2027 IPL තරගාවලියේ බැංගලෝර් කණ්ඩායම ක්‍රීඩා කරන පළමු තරගය අහිමි වනු ඇත.

පළමු මට්ටමේ විනය උල්ලංඝනය කිරීමක් ලෙස සැලකෙන මෙම වරද වෙනුවෙන් ඩේවිඩ්ගේ තරග ගාස්තුවෙන් සියයට 50ක් දඩ මුදලක් ලෙස අය කිරීමටත්, ඔහුට සෘණ ලකුණු දෙකක් පැනවීමටත් කටයුතු කළ බව IPL පාලක මණ්ඩලය පසුගිය සඳුදා නිවේදනය කළේය.

තරගයක් අතරතුරදී ක්‍රීඩකයෙකු, කණ්ඩායම් නිලධාරියෙකු, විනිසුරුවරයෙකු හෝ වෙනත් අයෙකු දෙසට නොහොබිනා හෝ අනතුරුදායක අයුරින් පන්දුවක් හෝ වෙනත් ක්‍රිකට් උපකරණයක් දමා ගැසීම තහනම් කෙරෙන IPL විනය පද්ධතියේ 2.9 වගන්තිය උල්ලංඝනය කිරීම සම්බන්ධයෙන් මෙම ඔස්ට්‍රේලියානු ක්‍රීඩකයා වරදකරු වී ඇත.

මෙම සිදුවීම වාර්තා වූයේ තරගයේ පළමු ඉනිමේ 10 වැනි පන්දුවාරයේදීය. කඩුල්ලක් බිඳ වැටීමෙන් අනතුරුව ඩේවිඩ් ආවේගශීලී ලෙස විනිසුරු නිතින් මෙනන් සිටි දෙසට අයිස් බෑගයක් විසි කළ බව IPL බලධාරීන් පවසයි. තමන් අතින් සිදු වූ වරද පිළිගත් ටිම් ඩේවිඩ්, තරග තීරක ජවගල් ශ්‍රීනාත් විසින් පනවන ලද මෙම දඬුවම ද පිළිගෙන තිබේ.

මෙම වරද වෙනුවෙන් ක්ෂණිකව පැනවුණේ දඩයක් සහ සෘණාත්මක ලකුණු දෙකක් වුවද, එය මෙම තරග වාරය තුළ ඩේවිඩ් සිදු කළ තෙවැනි විනය උල්ලංඝනය කිරීම නිසා ඔහුට බරපතළ ප්‍රතිඵලයකට මුහුණ දීමට සිදු විය.

ඔහු මීට පෙර 20 වැනි තරගයේදී එක් සෘණාත්මක ලකුණක් ද, 54 වැනි තරගයේදී තවත් සෘණාත්මක ලකුණු දෙකක් ද ලබා සිටියේය.

මෙම නවතම වරදද සමඟින් මෙම තරග වාරය තුළ ඔහු ලබාගත් සමස්ත සෘණාත්මක ලකුණු සංඛ්‍යාව 5 දක්වා ඉහළ ගිය අතර, IPL විනය රීතිවලට අනුව සෘණාත්මක ලකුණු 5 සීමාව පසු කිරීම නිසා ඔහුට මෙම එක් තරගයක තහනම ස්වයංක්‍රීයවම ක්‍රියාත්මක විය.