සිදුකරන ලද නවතම ඉන්ධන මිල සංශෝධනය පිළිබඳව පැහැදිලි කරමින් ලංකා ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා ප්‍රකාශ කළේ, මේ වන විට අලෙවි කරන සෑම ඔටෝ ඩීසල් ලීටරයකින්ම රුපියල් 129 ක සහ ඔක්ටේන් 92 පෙට්‍රල් ලීටරයකින් රුපියල් 60 ක පාඩුවක් සංස්ථාව ලබන බවයි.

සභාපතිවරයාට අනුව, ඔටෝ ඩීසල් ලීටරයක් සැපයීම සඳහා වැයවන සැබෑ පිරිවැය රුපියල් 536 ක් පමණ වන නමුත්, එය අලෙවි කරනු ලබන්නේ රුපියල් 407 කටය. ඒ අනුව ඉන් ලීටරයකට රුපියල් 129 ක පාඩුවක් සිදු වේ.

එමෙන්ම ඔක්ටේන් 92 පෙට්‍රල් ලීටරයක් සැපයීම සඳහා රුපියල් 494 ක පමණ පිරිවැයක් වැයවුවද, එය රුපියල් 434 කට අලෙවි කිරීම හේතුවෙන් ලීටරයකට රුපියල් 60 ක පාඩුවක් ලබන බවද ඔහු පැවසීය.

ලෝක වෙළෙඳපොළේ තෙල් මිල ඉහළ යෑමේ බලපෑමෙන් පාරිභෝගිකයන් ආරක්ෂා කරගැනීම සඳහා රජය පසුගිය මාස කිහිපය තුළ මෙම පාඩුවෙන් සැලකිය යුතු කොටසක් දරා ඇති බවද සභාපතිවරයා සඳහන් කළේය.

ඉන්ධන මිල සහනාධාර ලබාදීම වෙනුවෙන් රජය රුපියල් බිලියන 57ක් වෙන්කර ඇති නමුත්, ඒ සඳහා වෙන්කර ඇති ප්‍රතිපාදන ජූනි මාසය අවසන් වන විට සම්පූර්ණයෙන්ම වැයවනු ඇතැයි අපේක්ෂා කරන බවද ඔහු පෙන්වාදුන්නේය.

ලෝක වෙළෙඳපොළේ තෙල් මිල ඉහළ යාම සහ රටේ ඉන්ධන ආනයන වියදම ඉහළයෑම හේතුවෙන් මෙම ඉන්ධන මිල සංශෝධනය සිදුකිරීමට සිදු වූ බව පැවසූ සභාපතිවරයා, තවදුරටත් මෙලෙස අධික සහන මිලට ඉන්ධන අලෙවි කිරීම රටේ ආර්ථිකයට සහ විදේශ විනිමය සංචිතවලට දැඩි පීඩනයක් එල්ල කරනු ඇතැයි අනතුරු ඇඟවීය.

එමෙන්ම, අධික ලෙස ඉන්ධන පරිභෝජනය කිරීම හේතුවෙන් රුපියලේ අගය කෙරෙහි පීඩනය තවදුරටත් දැඩි වී පුළුල් ආර්ථික බලපෑම් ඇති විය හැකි බැවින්, හැකිතාක් දුරට ඉන්ධන පරිභෝජනය සීමාකරන ලෙසද ඔහු මහජනතාවගෙන් ඉල්ලා සිටියේය.

මින් ඉදිරියට QR කේත ක්‍රමය (QR code system) හරහා ඉන්ධන බෙදාහැරීම අධීක්ෂණය කිරීම ලංකා ඛනිජ තෙල් නීතිගත සංස්ථාව විසින් තවදුරටත් ශක්තිමත් කරන බවත්, නියමිත ක්‍රියාපටිපාටි අනුගමනය කිරීමට අපොහොසත් වන පිරවුම්හල් හිමියන්ට එරෙහිව දැඩි පියවර ගන්නා බවත් සභාපතිවරයා වැඩිදුරටත් ප්‍රකාශ කළේය.