CCTV කැමරා පද්ධති මඟින් රථවාහන වැරදි හඳුනාගෙන ඇති බව පවසමින්, ව්‍යාජ කෙටි පණිවුඩ (SMS) සහ වට්ස්ඇප් (WhatsApp) පණිවුඩ මඟින් රියදුරන් මුලාකර මුදල් වංචා කිරීමේ ජාවාරමක් පිළිබඳ පොලිසිය මහජනතාව වෙත විශේෂ අනතුරු ඇඟවීමක් නිකුත් කර තිබේ.

පොලිස් මාධ්‍ය කොට්ඨාසය නිවේදනයක් නිකුත් කරමින් සඳහන් කරන්නේ, මෙම ව්‍යාජ පණිවුඩ ශ්‍රී ලංකා පොලිසිය විසින් නිකුත් කරන ලද පණිවුඩ ලෙස පෙනී යන අයුරින් සකස් කර ඇති අතර, ඒවා ව්‍යාජ දුරකථන අංක භාවිත කරමින් එවනු ලබන බවයි.

පොලිසිය පවසන පරිදි, මෙම පණිවුඩ ලබාගන්නා පුද්ගලයන්ව ව්‍යාජ වෙබ් අඩවියක් වෙත යොමු කෙරෙන අතර, එහිදී අදාළ රථවාහන වැරදි සඳහා දඩ මුදල් ගෙවන ලෙසට උපදෙස් දෙනු ලබයි.

මහජනතාව නොමඟ යැවීමේ අරමුණින් මෙම ව්‍යාජ වෙබ් අඩවිය රජයේ නිල ‘GovPay’ ගෙවීම් පද්ධතියට බෙහෙවින් සමාන වන අයුරින් නිර්මාණය කර ඇති බව ද පොලිසිය අනාවරණ කරයි.

අදාළ ව්‍යාජ වෙබ් අඩවියට පිවිස දඩ මුදල් ගෙවීමට උත්සාහ කරන පුද්ගලයන්ගේ ක්‍රෙඩිට් කාඩ් තොරතුරු ඇතුළු සංවේදී පෞද්ගලික දත්ත වංචාකරුවන් සතු වීමේ දැඩි අවදානමක් පවතින බවට ද බලධාරීන් වැඩිදුරටත් අනතුරු අඟවා තිබේ.

මේ හේතුවෙන්, SMS හෝ වට්ස්ඇප් (WhatsApp) මඟින් ලැබෙන මෙවැනි සැකකටයුතු සබැඳි මත ක්ලික් කිරීමෙන් වළකින ලෙසත්, එවැනි පණිවුඩ පිළිබඳ දැඩි අවධානයෙන් හා ප්‍රවේශමෙන් කටයුතු කරන ලෙසත් පොලිස් මාධ්‍ය කොට්ඨාසය මහජනතාවගෙන් ඉල්ලා සිටියි.

‘GovPay’ පද්ධතිය හරහා රථවාහන දඩ මුදල් ගෙවිය යුත්තේ පොලිස් නිලධාරියකු විසින් නිල වශයෙන් වරදක් පිළිබව දැනුම් දීමෙන් පසුව සහ නිල දඩ පත්‍රිකාවක් ලැබීමෙන් පසුව පමණක් බව ද ශ්‍රී ලංකා පොලිසිය පැහැදිලි කර සිටියි.