විදේශීය ආයෝජකයන් ආකර්ෂණය කර ගැනීම සඳහා ශ්‍රී ලංකා ආයෝජන මණ්ඩලය විසින් නව ඩිජිටල් ආයෝජන වේදිකාවක් හඳුන්වා දී තිබේ.

මෙමඟින් විවිධ ක්ෂේත්‍රයන්ට අදාළව දැනටමත් සැලසුම් සකස් කර ඇති, වහාම ආයෝජනය කිරීමට සුදුසු ව්‍යාපෘති 30ක් සඳහා සෘජු ප්‍රවේශය ආයෝජකයන්ට හිමි වේ.

‘Ready to Invest’ ලෙස නම් කර ඇති මෙම ඩිජිටල් වේදිකාව මේ වන විට readytoinvestsl.com වෙබ් අඩවිය ඔස්සේ සක්‍රීය කර තිබේ.

ආයෝජන මණ්ඩලයට අනුව, මෙම වේදිකාව යටතේ ප්‍රධාන ක්ෂේත්‍ර 8ක් ඔස්සේ ආයෝජන අවස්ථා හඳුන්වා දී ඇත.

ඊට සංචාරක සහ විවේකී කටයුතු, නිෂ්පාදන ක්ෂේත්‍රය, ප්‍රවාහන හා සැපයුම් සේවා, තොරතුරු හා සන්නිවේදන තාක්ෂණය සහ නවෝත්පාදන හා තාක්ෂණික උද්‍යාන සංවර්ධනය, කෘෂිකර්මාන්තය සහ කෘෂි සැකසුම් කටයුතු, නාගරික හා මිශ්‍ර සංවර්ධන ව්‍යාපෘති, ගුවන් සේවා, වරාය සහ සමුද්‍රීය යටිතල පහසුකම් මෙන්ම පුනර්ජනනීය බලශක්තිය සහ තිරසාරභාවය යන ක්ෂේත්‍ර ඇතුළත් වේ.

අන්තර්ජාතික ආයෝජන හවුල්කාරිත්වයන් සඳහා දැනටමත් අවශ්‍ය ව්‍යුහය සකස් කර ඇති ව්‍යාපෘති සමඟ ගෝලීය ආයෝජකයන් සෘජුව සම්බන්ධ කිරීම මෙම වැඩසටහනේ අරමුණ බව ශ්‍රී ලංකා ආයෝජන මණ්ඩලය පවසයි.

ශ්‍රී ලංකාවේ වත්මන් ආයෝජන පසුබිම පිළිබඳ කරුණු දක්වමින් ආයෝජන මණ්ඩලය පෙන්වා දෙන්නේ, රට 2024 සහ 2025 යන වසර දෙකේදීම 5%ක දළ දේශීය නිෂ්පාදිතයේ වර්ධනයක් වාර්තා කර ඇති බවයි.

එමෙන්ම 2025 වසරේදී විදේශ සෘජු ආයෝජන ගලා ඒම ඇමරිකානු ඩොලර් බිලියන 1.06ක් දක්වා ළඟා වී ඇති අතර, එය ඊට පෙර වසරට වඩා 73%ක කැපී පෙනෙන වර්ධනයකි.

මීට අමතරව, ආයෝජන මණ්ඩලයේ අනුමැතිය ලත්, වහාම මෙහෙයුම් කටයුතු ආරම්භ කිරීමට සූදානම් තත්ත්වයේ පවතින ව්‍යාපෘතිවල වටිනාකම ඇමරිකානු ඩොලර් බිලියන 1.9ක් වන බව ද එහි සඳහන් වේ.

බොහෝ ක්ෂේත්‍රයන් සඳහා 100%ක විදේශීය හිමිකාරිත්වයට ශ්‍රී ලංකාව තුළ අවස්ථාව සලසා දී ඇති බවත්, ආයෝජනය කරන ප්‍රාග්ධනය සහ ඉන් ලබන ලාභය නැවත තමන්ගේ රටවලට රැගෙන යෑමේ පූර්ණ වගකීම හා සහතිකය රජය විසින් ලබා දෙන බවත් ශ්‍රී ලංකා ආයෝජන මණ්ඩලය වැඩිදුරටත් අවධාරණය කරයි.

ඉන්දියන් සාගරය තුළ ශ්‍රී ලංකාව පිහිටා ඇති උපායමාර්ගික පිහිටීම සහ ඉංග්‍රීසි භාෂාව හැසිරවිය හැකි මෙරට දක්ෂ ශ්‍රම බලකාය ආයෝජකයන්ට ඇති ප්‍රධානතම වාසිදායක තත්ත්වයන් බව ද එම මණ්ඩලය පෙන්වා දෙයි.