සැකකටයුතු ලෙස මියගිය ශ්‍රීලන්කන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේනගේ ජංගම දුරකථනය අගුළු හැරීම සඳහා සහය ලබාදෙන ලෙස ඉල්ලා ඇමරිකා එක්සත් ජනපදයේ ෆෙඩරල් විමර්ශන කාර්යාංශය හෙවත් FBI වෙත විද්‍යුත් තැපැල් පණිවිඩයක් යොමු කර ඇති බව කොළඹ අපරාධ කොට්ඨාසය අද කොළඹ කොටුව මහේස්ත්‍රාත් අධිකරණයට දැනුම් දුන්නේය.

විමර්ශන නිලධාරීන් ප්‍රකාශ කළේ අදාළ දුරකථනය සම්බන්ධයෙන් ඉදිරි ක්‍රියාමාර්ග ගනු ලබන්නේ FBI ආයතනයෙන් ලැබෙන උපදෙස් මත පදනම්ව බවයි.

කපිල චන්ද්‍රසේනගේ මරණය සම්බන්ධයෙන් කොළඹ කොටුව මහේස්ත්‍රාත් පසන් අමරසේකර ඉදිරියේ අඛණ්ඩව පස්වැනි දිනටත් පැවැති මහේස්ත්‍රාත් පරීක්ෂණයේදී මෙම කරුණු අනාවරණය විය.

අද දින නඩු විභාගයේදී සාක්ෂිකරුවෝ දෙදෙනෙක් සාක්ෂි ලබා දුන්හ.

කොළඹ අපරාධ කොට්ඨාසයේ නිලධාරීන් අධිකරණයට වැඩිදුරටත් දන්වා සිටියේ සාක්ෂි ලබාදීම සඳහා පැමිණෙන ලෙස ජනාධිපති නීතිඥ රියන්සි අර්සකුලරත්න සහ කනිෂ්ඨ නීතිඥ උදාර මුහන්දිරම්ගේ වෙත දැනුම් දී තිබූ බවයි.

කෙසේවෙතත්, වෙනත් අධිකරණ කටයුතු හේතුවෙන් අද දින පැමිණීමට නොහැකි බව දන්වා සිටි එම නීතිඥවරුන්, ඉදිරි දිනයකදී පැමිණීම සඳහා සිතාසි නිකුත් කරන ලෙස අධිකරණයෙන් ඉල්ලා තිබිණි.

මෙහිදී මහේස්ත්‍රාත්වරයා පෙන්වා දුන්නේ මේ වන විටත් සාක්ෂිකරුවන් 18 දෙනෙකුගේ සාක්ෂි සටහන් කරගෙන ඇති බවයි.

මීට පෙර සාක්ෂිකරුවන් කිසිදු නිල සිතාසියක් නොමැතිව අධිකරණය හමුවේ පෙනී සිට තිබියදී, 19 සහ 20 වැනි සාක්ෂිකරුවන් සඳහා පමණක් සිතාසි ඉල්ලා සිටින්නේ මන්දැයි මහේස්ත්‍රාත්වරයා විමර්ශන නිලධාරීන්ගෙන් ප්‍රශ්න කළේය.

විමර්ශන නිලධාරීන් පිළිතුරු දෙමින් කියා සිටියේ, සිතාසි නිකුත් කරන්නේ නම් පමණක් පැමිණෙන බව අදාළ නීතිඥවරුන් දෙදෙනා ප්‍රකාශ කළ බවයි.

කෙසේවෙතත්, මීට පෙර අනුගමනය කළ සාමාන්‍ය ක්‍රියාපටිපාටිය වූයේ විමර්ශන නිලධාරීන් දැනුම්දුන් පසු සිතාසි නොමැතිව සාක්ෂිකරුවන් පැමිණීම බැවින්, එම ක්‍රමවේදයම ඉදිරියටත් අනුගමනය කළ යුතු බව මහේස්ත්‍රාත්වරයා තීන්දු කළේය.

ඒ අනුව, නීතිඥවරුන් දෙදෙනාට සාක්ෂි දීම සඳහා බලකරමින් සිතාසි නිකුත් කිරීමට කොළඹ අපරාධ කොට්ඨාසය කළ ඉල්ලීම අධිකරණය ප්‍රතික්ෂේප කළේය.

මේ අතර, චන්ද්‍රසේන වෙනුවෙන් ඇප අත්සන් කළ ඇපකරුවෙකු වන ඉන්දික රත්නායකගෙන් ද සාක්ෂි සටහන් කර ගැනිණි.

ඔහු ප්‍රකාශ කළේ, තමන් අත්අඩංගුවට ගැනීමට පෙර චන්ද්‍රසේන තමන් අමතා තමන් වෙනුවෙන් ඇප වීමට සූදානම්ව සිටින ලෙසත්, ඒ සඳහා අවශ්‍ය ග්‍රාම නිලධාරී සහතික ලේඛන සූදානම් කර තබා ගන්නා ලෙසත් උපදෙස් දුන් බවයි.

මැයි 5 වැනිදා චන්ද්‍රසේනට ඇප ලැබීමෙන් පසු තමන් රුපියල් මිලියන 10ක පෞද්ගලික ඇප බැඳුම්කරයකට අත්සන් කළ බව රත්නායක අධිකරණයට පැවසීය.

පසුව ඔහු චන්ද්‍රසේනගේ හිතවතුන් සහ නීතිඥ කණ්ඩායම හමුවී ඇති අතර, මැයි 8 වැනිදා චන්ද්‍රසේනගේ මරණය පිළිබඳ දැනගැනීමෙන් පසු ඒ පිළිබඳ විමසීමට අදාළ පාර්ශවයන් සම්බන්ධ කරගත් බව ද කියා සිටියේය.

තමන් රිමාන්ඩ් බන්ධනාගාරගත කිරීමටත් ප්‍රථම, තමන් වෙනුවෙන් ඇපකරුවකු අවශ්‍ය වන බව චන්ද්‍රසේන සෘජුවම තමන්ට දන්වා තිබූ බව ද සාක්ෂිකරු පැවසීය.

මීට අමතරව, අරවින්ද සිල්වාට සම්බන්ධ නිවසක සීසීටීවී කැමරා පද්ධතියක් සවි කිරීමේ කටයුත්තක් සම්බන්ධයෙන් විදුලි කාර්මික ශිල්පියකු වන හේමන්ත සමන්කුමාර ද අධිකරණය හමුවේ සාක්ෂි ලබා දුන්නේය.

නඩුවේ වැඩිදුර මහේස්ත්‍රාත් පරීක්ෂණය මැයි 29 වැනිදා දක්වා කල් තැබිණි.