ශ්‍රී ලංකා රජය විසින් ඕස්ට්‍රේලියානු රජය වෙත ණය පියවීම් වාරිකයක් ලෙස ගෙවීමට වෙන් කර තිබූ ඇමරිකානු ඩොලර් මිලියන 2.5ක මුදලක් සයිබර් ප්‍රහාරයක් මඟින් සොරකම් කිරීමේ සිද්ධියට අදාළ විමර්ශන සඳහා, ශ්‍රී ලංකාවේ ඕස්ට්‍රේලියානු මහකොමසාරිස් කාර්යාලයේ සිටින ඕස්ට්‍රේලියානු ෆෙඩරල් පොලිස් (AFP) නිලධාරීන් මේ වන විට ශ්‍රී ලංකා පොලිසියට සහය වෙමින් සිටින බව නිලධාරියෙක් ප්‍රකාශ කර තිබේ.

මුදල් අමාත්‍යාංශයේ පරිගණක පද්ධතියට රහසිගතව ඇතුළු වූ සයිබර් අපරාධකරුවන් පිරිසක් විසින් මෙම ඇමරිකානු ඩොලර් මිලියන 2.5ක මුදල ශ්‍රී ලංකාවට අහිමි කර තිබිණි.

මේ සම්බන්ධයෙන් ඕස්ට්‍රේලියානු ෆෙඩරල් පොලිසියේ සහයෝගීතාවයේ වත්මන් තත්ත්වය පිළිබඳ පුවත්පතක් කළ විමසීමකට පිළිතුරු දෙමින්, මෙරට ඕස්ට්‍රේලියානු මහකොමසාරිස් මැතිව් ඩක්වර්ත් ප්‍රකාශ කර ඇත්තේ එම සහයෝගීතා කටයුතු මේ වන විටත් අඛණ්ඩව සිදුවෙමින් පවතින බවයි.

“මෙවැනි සිදුවීම් සම්බන්ධයෙන් අප අතර පවතින සම්මුතීන්ට සහ විධිවිධානයන්ට අනුකූලව, ඕස්ට්‍රේලියානු ෆෙඩරල් පොලිසිය විසින් ශ්‍රී ලංකා පොලිසියේ විමර්ශන කටයුතු සඳහා සහයෝගය ලබා දෙනවා. මෙය දැනටමත් ක්‍රියාත්මක වෙමින් පවතින ක්‍රියාවලියක්,” යැයි ඔහු පවසා තිබේ.

“කොළඹ පිහිටි ඕස්ට්‍රේලියානු මහකොමසාරිස් කාර්යාලයේ සේවය කරන ඕස්ට්‍රේලියානු ෆෙඩරල් පොලිස් නිලධාරීන් ද මෙම විමර්ශන ක්‍රියාවලියේ කොටස්කරුවන්” යැයි මහකොමසාරිස්වරයා වැඩිදුරටත් සඳහන් කළේය.