ගාලු මුවදොර අරගලකරුවන්ට එල්ල වූ ප්‍රහාර පිළිබඳ සමාජ මාධ්‍ය ඔස්සේ වාර්තා කිරීම හේතුවෙන් පසුගිය ගෝඨාභය රාජපක්ෂ සහ රනිල් වික්‍රමසිංහ රජයන් සමයේ පිටුවහල් කිරීමේ නියෝගයක් නිකුත් කෙරුණු බ්‍රිතාන්‍ය ජාතික කේයිලි ෆ්‍රේසර් එම පිටුවහල් කිරීමේ නියෝගය අවලංගු කර සාමකාමීව රටින් පිටවීමට අවස්ථාව සලසා දෙන ලෙස වත්මන් රජයෙන් ඉල්ලා සිටියි.

2022 අගභාගයේ සිට ඇය මෙරට සැඟවී සිටියි.

ඇයගේ නීතිඥ නාගානන්ද කොඩිතුවක්කු ප්‍රකාශ කරන්නේ, ඇය කිසිසේත්ම බලහත්කාරයෙන් පිටුවහල් කිරීමට ලක්වීමට අකමැති බවයි.

රජය ඇයට භාරවන ලෙස දන්වා සිටියද, අරගලයේ ප්‍රධාන ප්‍රතිලාභියා වූ වත්මන් ජාතික ජන බලවේග රජය ඇය වෙනුවෙන් මැදිහත් වීමට අපොහොසත් වී ඇති බවට ඔහු චෝදනා කරයි.

මේ සම්බන්ධයෙන් 2024 ඔක්තෝබර් 03 වැනිදා ජනාධිපති අනුර කුමාර දිසානායක වෙත අභියාචනයක් ඉදිරිපත් කළ ද ඉන් පලක් නොවූ බවත්, පාර්ලිමේන්තු මැතිවරණයෙන් පසු මෙම නියෝගය ඉවත් කරන බවට ලැබුණු පොරොන්දුව ද රජය ඉටු නොකළ බවත් ඔහු පවසයි.

හිටපු රජයන්ට එරෙහි අරගලයේදී ඇය ඉටුකළ කාර්යභාරය පිළිබඳ අග්‍රාමාත්‍ය හරිනි අමරසූරිය දැනුවත් බැවින්, ඇය මේ පිළිබඳ සොයා බලා මැදිහත් විය යුතු බව නීතිඥවරයා අවධාරණය කරයි.

මේ අතර බ්‍රිතාන්‍ය මහකොමසාරිස් කාර්යාලය ද ඇයට උපකාර කිරීම ප්‍රතික්ෂේප කර ඇත.

2022 අගෝස්තු 02 වැනිදා ආගමන විගමන නිලධාරීන් බත්තරමුල්ලේ පිහිටි ඇයගේ නිවස වටලා විදේශ ගමන් බලපත්‍රය භාරගෙන තිබූ අතර, 2023 මාර්තු දක්වා වලංගුව තිබූ වීසා බලපත්‍රය අවලංගු කරමින් අගෝස්තු 15 වැනිදාට පෙර රටින් පිටවන ලෙස නියෝග කර තිබිණි.

මෙම නඩුවේ පවතින දේශපාලන ස්වභාවය නිසා ප්‍රමුඛ පෙළේ ජනාධිපති නීතිඥවරුන් ඇය වෙනුවෙන් පෙනී සිටීම ප්‍රතික්ෂේප කළ බැවින්, නාගානන්ද කොඩිතුවක්කු ස්වේච්ඡාවෙන් මෙම නඩුව භාරගෙන ඇත.

අභියාචනාධිකරණය සහ ශ්‍රේෂ්ඨාධිකරණය හමුවේ මෙම තීරණය අභියෝගයට ලක් කළ ද, තාක්ෂණික දෝෂයන් වැනි හේතු මත නඩුව විභාග කිරීම දිගින් දිගටම කල්ගොස් තිබේ.

අවසාන වශයෙන් 2022 දෙසැම්බර් 08 වැනිදා විනිසුරු ප්‍රියන්ත ජයවර්ධන විසින් නඩුව මාස හතකින් කල් දැමීමෙන් පසු, ඇය නීතියෙන් බේරීම සඳහා මෙලෙස සැඟවී ජීවත් වීමට තීරණය කර ඇත.