May 22, 2026
2023 අගෝස්තු මාසයේදී පන්ජාබ් ප්රාන්තයේ ජරන්වාලා හි පිහිටි දේවස්ථාන සහ ක්රිස්තියානි නිවාස රැසකට එල්ල වූ ප්රහාරවලට සම්බන්ධ සියලුම සැකකරුවන් අත්අඩංගුවට ගන්නා ලෙස ශ්රේෂ්ඨාධිකරණය ලබා දුන් නියෝග ක්රියාත්මක කිරීමට පකිස්ථාන පොලිසිය අපොහොසත් වී ඇති බව ක්රිස්තියානි පූජකවරයෙකු ප්රකාශ කර තිබේ.
එම ප්රචණ්ඩක්රියාවලින් තම නිවසද විනාශයට පත් වූ පූජක කලීඩ් මුක්තාර් පවසන්නේ, සැඟවී සිටින සැකකරුවන් වහාම අත්අඩංගුවට ගන්නා ලෙසත්, මාස හයක් ඇතුළත නඩු විභාග අවසන් කරන ලෙසත් ෆයිසලාබාද් ත්රස්ත විරෝධී අධිකරණයට නියෝග කරමින් මාර්තු 31 වැනිදා ශ්රේෂ්ඨාධිකරණය තීන්දුවක් ලබා දුන්නද, බලධාරීන් මෙතෙක් කිසිදු ප්රගතියක් පෙන්වා නොමැති බවයි.
දැනට ෆයිසලාබාද්හි ශාන්ත ජෝසප් දේවස්ථානයේ පූජකවරයා ලෙස කටයුතු කරන මුක්තාර් පෙන්වා දුන්නේ ප්රහාරවලට සම්බන්ධ බොහෝ පිරිස් හඳුනාගත හැකි වීඩියෝ සහ ඡායාරූප සාක්ෂි පොලිසියට ලබා දී තිබියදීත්, අත්අඩංගුවට ගැනීම් සම්බන්ධයෙන් කිසිදු සාර්ථක ප්රගතියක් නොමැති බවයි.
මෙම අධිකරණ තීන්දුවෙන් පසුව කිහිප වතාවක්ම ජ්යෙෂ්ඨ පොලිස් නිලධාරීන් හමුවූ නමුත් ඔවුන් ලබා දුන් පොරොන්දු ප්රායෝගිකව ඉටු වී නොමැති බව ද ඔහු චෝදනා කළේය.
පොලිසිය විසින් අධිචෝදනා පත්ර ඉදිරිපත් කර ඇති සැකකරුවන් 336 දෙනා අතරින් දැනට බන්ධනාගාරගතව පසුවන්නේ එක් අයෙකු පමණක් වන අතර අනෙක් අය ඇප මත නිදහස් වී හෝ ක්රිස්තියානි පැමිණිලිකරුවන් විසින් පවරන ලද නඩුවලින් නිදහස් කර ඇති බව මුක්තාර් පැවසීය.
