වෙනස්වන ගෝලීය තත්ත්වයන් සහ බාහිර ගැටලු හේතුවෙන් 2026 සඳහා ශ්‍රී ලංකාවේ ආර්ථික වර්ධනය තවමත් අවිනිශ්චිත බව ශ්‍රී ලංකා මහබැංකුවේ අධිපති නන්දලාල් වීරසිංහ පැවසීය.

පසුගිය මාසවලදී ලෝක ආර්ථිකය වෙනස් වී ඇති බැවින්, ආර්ථික වර්ධනය පුරෝකථනය කිරීම දැන් දුෂ්කර බව ඔහු සඳහන් කළේය.

ඔහුට අනුව, මෙම ගෝලීය ගැටලු කොපමණ කාලයක් පවතින්නේද යන්න මත ශ්‍රී ලංකාවට ඇති බලපෑම රඳා පවතී.

තත්වය ඉක්මනින් සමනය වුවහොත්, බලපෑම කුඩා විය හැකිය. එහෙත් ගැටළු දිගු කාලයක් පැවතුණහොත්, ආර්ථික වර්ධනය මන්දගාමී විය හැකිය.

දුර්වල වන ශ්‍රී ලංකා රුපියල ගැන කතාකරමින් නනදලාල් වීරසිංහ පැවසුවේ, ඊට ප්‍රධාන හේතුව මැදපෙරදිග අර්බුදය සහ ගෝලීය තෙල් මිල ඉහළ යෑම බවයි. තෙල් මිල ඉහළ යෑම හේතුවෙන් ශ්‍රී ලංකාවේ විදේශ මුදල් වැයවීම වැඩි වී තිබේ.

ඉන්දියාව, නේපාලය, ඉන්දුනීසියාව සහ තායිලන්තය වැනි ඉන්ධන ආනයනය කරන අනෙකුත් රටවල ද ඔවුන්ගේ මුදල් වර්ග දුර්වල වී ඇති බව ඔහු පෙන්වා දුන්නේය.

වත්මන් තත්ත්වය ශ්‍රී ලංකාවේ 2022 ආර්ථික අර්බුදයට වඩා බෙහෙවින් වෙනස් බවත්, අතීතයේ එය ප්‍රධාන වශයෙන් දේශීය ආර්ථික ගැටලු නිසා ඇති වූ බවත් මහබැංකු අධිපතිවරයා පැවසීය.

රුපියලේ අගය පහත වැටීම යන්නෙන් අදහස් කරන්නේ ආර්ථිකය නැවත කඩාවැටෙන බව නොවන බව ඔහු පෙන්වදුනේය.

අන්තර්ජාතික මූල්‍ය අරමුදලේ ණය වැඩසටහන යටතේ ඉදිරි දිනවලදී ඇමරිකානු ඩොලර් මිලියන 700 ක් පමණ ශ්‍රී ලංකාවට ලැබෙනු ඇතැයි අපේක්ෂා කරන බව ද නන්දලාල් වීරසිංහ පැවසීය.

ඊට අමතරව, ලෝක බැංකුවෙන් සහ ආසියානු සංවර්ධන බැංකුවෙන් ඇමරිකානු ඩොලර් මිලියන 300 කට ආසන්න ප්‍රමාණයක් අපේක්ෂා කෙරේ.

මෙම මුදල් විදේශ සංචිත වැඩිවීම ආර්ථික ස්ථාවරත්වයට සහාය වනු ඇතැයි ඔහු පැවසීය.

මේ අතර, එක්සත් ජනපද ඩොලරයේ විකුණුම් මිල ඊයේ රුපියල් 334 දක්වා ඉහළ ගිය අතර එය 2023 නොවැම්බර් 29 න් පසු වාර්තා වූ ඉහළම මට්ටමයි.