ඉඩමක් අඩු වටිනාකමකට තක්සේරු කර වාර්තාවක් ලබා ගැනීම සඳහා රුපියල් 35,000ක අල්ලසක් ලබා ගැනීමේ චෝදනාව මත පොළොන්නරුවේ පළාත් ආදායම් දෙපාර්තමේන්තු දිස්ත්‍රික් කාර්යාලයට අනුයුක්ත සනීපාරක්ෂක සේවකයකු අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අද (13) අත්අඩංගුවට ගෙන තිබේ.

පොළොන්නරුවේ පදිංචිකරුවකු විසින් කරන ලද පැමිණිල්ලකට අනුව අද පෙ.ව. 9.27ට පමණ සිදු කරන ලද වැටලීමකදී මෙම අත්අඩංගුවට ගැනීම සිදු කළ බව එම කොමිසම පවසයි.

අල්ලස් හෝ දූෂණ චෝදනා විමර්ශන කොමිෂන් සභාවට අනුව, පැමිණිලිකරුගේ ඥාති සහෝදරයාට අයත් රජය සතු දේපළක් පැමිණිලිකරුගේ නමට පැවරීම සඳහා ඔප්පුවක් සකස් කිරීමේදී ඉඩමේ වටිනාකම අඩු කිරීමට සැකකරු පොරොන්දු වී ඇති බව කියනු ලැබේ.

රජයට ගෙවිය යුතු මුද්දර ගාස්තු අඩු කිරීම සඳහා සැකකරු මුලින් රුපියල් 50,000ක අල්ලසක් ඉල්ලා ඇත.

කෙසේවෙතත්, දෙපාර්ශවය අතර සාකච්ඡාවලින් පසු, එම මුදල රුපියල් 35,000 දක්වා අඩු කර ඇති බව නිලධාරීහු පැවසූහ.

සැකකරු පොළොන්නරුවේ පිහිටි පළාත් ආදායම් දෙපාර්තමේන්තු දිස්ත්‍රික් කාර්යාලයේ පරිශ්‍රයේදී අල්ලස ලබා ගනිමින් සිටියදී අත්අඩංගුවට ගෙන ඇත.

අත්අඩංගුවට ගත් පුද්ගලයා එම කාර්යාලයට අනුයුක්ත සනීපාරක්ෂක සේවකයකු ලෙස හඳුනාගෙන ඇත.

සැකකරු පොළොන්නරුව මහේස්ත්‍රාත් අධිකරණයට ඉදිරිපත් කිරීමට නියමිත අතර, වැඩිදුර විමර්ශන අල්ලස් කොමිසමේ නිලධාරීන් විසින් සිදු කරනු ලැබේ.