වීඩියෝ ඇමතුම් ලබාගෙන පසුව තර්ජනය කරමින් මුදල් ඉල්ලා සිටීමේ WhatsApp මූලික කරගත් නව වංචාවක් පිළිබඳ ශ්‍රී ලංකා පරිගණක හදිසි ප්‍රතිචාර සංසදය (CERT) මහජනතාවට අනතුරු අඟවයි.

එම සංසදය පවසන්නේ වංචාකරුවන් පළමුව ව්‍යාජ ගිණුම් හරහා විවිධ පුදගලයන්ගේ සමාජ මාධ්‍ය ජාල වෙත ප්‍රවේශය ලබා ගන්නා බවයි.

මෙහිදී බොහෝ විට ඉලක්ක කරන්නේ ෆේස්බුක් හි ඇති සම්බන්ධතාය.

සාමාන්‍යයෙන් නිරුවත් කාන්තාවක් ඇතුළත් වීඩියෝ ඇමතුමක් හරහා පසුව එම පුදගලයන් WhatsApp හරහා සම්බන්ධ කර ගනු ලැබේ.

ඇමතුම අතරතුර, වංචාකරුවන් වින්දිතයාගේ මුහුණ ඇතුළත් වන පරිදි සිදුවීම පටිගත කර ගනී.

පටිගත කරන ලද දර්ශන පසුව වින්දිතයන්ට තර්ජනය කිරීම සඳහා භාවිත කරනු ලැබේ.

වංචාකරුවන් මුදල් ඉල්ලා සිටින අතර ගෙවීම් සිදු නොකළහොත් වීඩියෝව සමාජ මාධ්‍යවල බෙදා හරින බවට අනතුරු අඟවයි.

බලධාරීන් පැවසුවේ වින්දිතයන්ට විදේශීය බැංකු ගිණුම් වෙත මුදල් මාරු කරන ලෙස ඔවුන් බොහෝ විට උපදෙස් දෙන බවයි.

ඒ අනුව නොදන්නා වීඩියෝ ඇමතුම් සමඟ සම්බන්ධ නොවන ලෙසත් එවැනි සිදුවීම් වහාම වාර්තා කරන ලෙසත් ශ්‍රී ලංකා පරිගණක හදිසි ප්‍රතිචාර සංසදය මහජනතාවට උපදෙස් දෙයි.

බලපෑමට ලක් වූවන්ට 101 ක්ෂණික දුරකථන අංකය හෝ (report@cert.gov.lk) විද්‍යුත් තැපෑල හරහා ශ්‍රී ලංකා පරිගණක හදිසි ප්‍රතිචාර සංසදය ඇමතීම හෝ ළඟම ඇති පොලිස් ස්ථානයට පැමිණිල්ලක් ඉදිරිපත් කළ හැකිය.