ඉන්දියන් සාගරයේ පිහිටි රටවල් කිහිපයක් ඔහුගේ ගුවන් ගමන් අවහිර කිරීම හේතුවෙන් තායිවාන ජනාධිපති විලියම් හට සිය රාජ්‍ය තාන්ත්‍රික සංචාරයක් කල් දැමීමට සිදු විය.

චීනයේ බලපෑම මත එම ගුවන් ගමන් අවහිර වූ බවට තායිවාන රජය චෝදනා කළ අතර, එම සිදුවීමෙන් සති දෙකකට පසු ඔහු ඊයේ (02) එස්වාටිනි රාජ්‍යය වෙත ළඟා විය.

දකුණු අප්‍රිකාවේ පිහිටි එස්වාටිනි රාජ්‍යය යනු තායිවානය සමඟ රාජ්‍ය තාන්ත්‍රික සබඳතා පවත්වන කුඩා රටවල් 12 න් එකකි.

මෙම රටවල් බහුතරයක් ලතින් ඇමරිකාව, කැරිබියන් සහ පැසිෆික් කලාපයේ පිහිටා ඇත.

ප්‍රජාතන්ත්‍රවාදී පාලනයක් සහිත තායිවානය තමන්ගේම භූමියක් ලෙස සලකන චීනයට එරෙහිව, මෙම රටවල් සමඟ සබඳතා පවත්වා ගැනීම තායිවාන රජයේ ප්‍රමුඛතාවයකි.

පසුගිය මාසයේදී, තුන්වන එම්ස්වාටි රජුගේ අභිෂේකයේ 40 වන සංවත්සරයට සහභාගී වීම සඳහා වූ සංචාරය ලායි විසින් කල් දමන ලදී.

එහිදී තායිවානය ප්‍රකාශ කළේ චීනයේ බලපෑම මත සීෂෙල්ස්, මුරුසිය සහ මැඩගස්කරය යන රටවල් ඔවුන් පාලනය කරන ගුවන් සීමාව හරහා ලායිගේ ගුවන් යානයට ගමන් කිරීමට ලබා දී තිබූ අවසර පත්‍ර ඒකපාර්ශ්විකව අවලංගු කළ බවයි.

ගුවන් සීමාවට ප්‍රවේශය ප්‍රතික්ෂේප කිරීම හේතුවෙන් තායිවාන ජනාධිපතිවරයෙකුට සම්පූර්ණ විදේශ සංචාරයක් අවලංගු කිරීමට සිදු වූ පළමු අවස්ථාව මෙය වන අතර, එය තායිවානයේ ජාත්‍යන්තර සබඳතා සීමා කිරීම සඳහා චීනය අනුගමනය කරන නව උපාය මාර්ගයක් ලෙස පෙනී යයි.

ලායි ඔහුගේ ෆේස්බුක් සහ එක්ස් X ගිණුම්වල සටහන් තබමින් කියා සිටියේ, දෙරටේම රජයන් විසින් මීට පෙර නිල වශයෙන් ප්‍රකාශයට පත් නොකළ සංචාරයක් යටතේ තමන් සෙනසුරාදා එස්වාටිනි වෙත පැමිණි බවයි.

“බාහිර බලපෑම් හමුවේ තායිවානය කිසිවිටෙකත් පසුබට වන්නේ නැත. අප මුහුණ දෙන අභියෝග මොනවා වුවත්, තායිවානය ලෝකය සමඟ අඛණ්ඩව ගනුදෙනු කරන බවට වන අවබෝධය මත අපගේ අධිෂ්ඨානය සහ කැපවීම පදනම් වී ඇත,” ඔහු ඉංග්‍රීසි භාෂාවෙන් ‘X’ ගිණුමේ සටහන් කර තිබුණි.

ඔහුගේ සමාජ මාධ්‍ය සටහන්වල හෝ ඔහුගේ කාර්යාලය නිකුත් කළ නිල ප්‍රකාශයක ඔහු එහි ගිය ආකාරය ගැන සඳහන් කර නොතිබුණද, ඔහු එහිදී ඡායාරූපයක් පළ කර තිබුණි.

එහි දැක්වුණේ ඔහු එස්වාටිනි රජයේ ජෙට් යානයකින් බැස එන ආකාරයයි.

එම යානයෙන්ම මෙම සතියේදී එස්වාටිනි නියෝජ්‍ය අග්‍රාමාත්‍ය තුලිසිල් ඩ්ලඩ්ලා තායිපේ නුවර වෙත පැමිණ තිබුණි.

චීන විදේශ අමාත්‍යාංශය ප්‍රකාශ කළේ ලායි රහසිගතව විදේශීය ගුවන් යානයකට නැග තායිවානයෙන් පැන ගොස් ඇති අතර, මහජන මුදල් අධික ලෙස නාස්ති කර ඇති බවයි.

ලායිගේ පක්ෂය වන ප්‍රජාතන්ත්‍රවාදී ප්‍රගතිශීලී පක්ෂය ප්‍රකාශයකින් පැවසුවේ ”ප්‍රජාතන්ත්‍රවාදී ප්‍රගතිශීලී පක්ෂ බලධාරීන් බාහිර බලවේග සමඟ කිනම් ආකාරයකින් කුමන්ත්‍රණය කළත්, හෝ කුමන ආකාරයකින් ‘අන් අයගේ පක්ෂපාතීත්වය මිලදී ගත්තත්’, තායිවානය චීනයේ කොටසක් යන සත්‍යය වෙනස් කිරීමට දරන ඒ සියලු උත්සාහයන් නිෂ්ඵල වනු ඇත.” යනුවෙනි.