අසල්වැසි කාන්තාවක් ස්නානය කරමින් සිටි වීඩියෝවක් රූගත කර ඇයගේ මිතුරියකට යවා ඇති බව කියන පුද්ගලයකු මැයි 4 වැනිදා දක්වා රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම නියෝග කර තිබේ.

කොළඹ 7 ප්‍රදේශයේ කුලී පදනම මත පදිංචි තරුණියක් කළ පැමිණිල්ලකට අනුව මරදමුනේ පදිංචි සැකකරු කුරුඳුවත්ත පොලිසිය විසින් අත්අඩංගුවට ගෙන තිබිණි.

පැමිණිලිකරු වෙනුවෙන් අධිකරණයට කරුණු ඉදිරිපත් කරමින් කුරුඳුවත්ත පොලිසියේ නිලධාරීන් ප්‍රකාශ කළේ සැකකරු පැමිණිලිකාරියගේ නිවසට යාබද නිවසක කුලී පදනම මත පදිංචිව සිට ඇති බවයි.

පැමිණිලිකාරිය ඇගේ නාන කාමරයේ ස්නානය කරමින් සිටියදී රහසිගතව රූගත කිරීම සඳහා සැකකරු තම ජංගම දුරකථනය භාවිත කර ඇති බව අනාවරණ වී තිබේ.

පසුව සැකකරු වින්දිතයාගේ මිතුරියකට වීඩියෝ දර්ශන යවා ඇති බව පොලිසිය අධිකරණයට දන්වා සිටියේය.

පැමිණිලිකාරිය ඇගේ මිතුරිය විසින් මේ සම්බන්ධයෙන් දැනුම්දීමෙන් පසු සිද්ධිය පිළිබඳ දැනුවත් වී ඇති බව ද අනාවරණ විය.

ඉන්පසු ඇය සැකකරුගේ නිවසට ගොස් ඔහුට වාචිකව බැණ වැදී ඔහුගේ ජංගම දුරකථනය කඩා දමා ඇත.

සිද්ධියෙන් පසු පැමිණිලිකාරිය කුරුඳුවත්ත පොලිස් ස්ථානයට පැමිණිල්ලක් ඉදිරිපත් කර තිබේ.

ඉන්පසු සැකකරු පොලිසිය විසින් අත්අඩංගුවට ගෙන අධිකරණයට ඉදිරිපත් කරන ලදී.

කරුණු සළකා බැලූ මහේස්ත්‍රාත්වරයා සැකකරු රක්ෂිත බන්ධනාගාර ගත කිරීමට නියෝග කළේය.