2026 ඉන්දීය ප්‍රිමියර් ලීග් සහ අනෙකුත් අන්තර්ජාතික ලීග් තරගාවලි සඳහා සහභාගී වීමට හැකි වන පරිදි ශ්‍රී ලංකා ක්‍රිකට් ආයතනයට විරෝධතා නොමැති සහතිකයක් (NOC) නිකුත් කිරීමට බලකරන ලෙස අතුරු නියෝගයක් ඉල්ලා ශ්‍රී ලංකා ක්‍රිකට් ක්‍රීඩක නුවන් තුෂාර කොළඹ දිස්ත්‍රික් අධිකරණය හමුවේ ගොනුකර තිබූ පෙත්සම ඉල්ලා අස්කර ගෙන තිබේ.

අද (23) නඩුව කැඳවූ අවස්ථාවේ, පෙත්සම්කරුගේ නීතිඥවරයා අධිකරණයට පැවසුවේ IPL තරඟ කිහිපයක් දැනටමත් අවසන් වී ඇති බවත් පෙත්සම්කරු තවදුරටත් අයැදුම්පත සමඟ ඉදිරියට යෑමට කැමති නැති බවත්ය.

එම කරුණු ඉදිරිපත් කිරීමෙන් පසු, අධිකරණය නඩුව ඉල්ලා අස්කර ගැනීමට අවසර ලබාදුන් අතර පසුව පෙත්සම නිෂ්ප්‍රභ කළේය.