මැයි දිනයට පෙර මහජන ජනප්‍රියත්වය ලබාගැනීමේ අරමුණින් ශ්‍රී ලංකා ක්‍රිකට් පරිපාලනයේ වෙනස්කම් පිළිබඳව රජය සලකා බලමින් සිටින බව සමගි ජන බලවේග (SJB) පාර්ලිමේන්තු මන්ත්‍රී එස්.එම්. මරික්කාර් ප්‍රකාශ කරයි.

මැයි 1 වැනි දිනට පෙර ජනාධිපතිවරයා වත්මන් ශ්‍රී ලංකා ක්‍රිකට් පරිපාලනය ඉවත්කර නව අතුරු පාලක මණ්ඩලයක් පත්කිරීමට ඉඩ ඇති බවට පළවන ජනමාධ්‍ය වාර්තා සම්බන්ධයෙන් අදහස් දක්වමින් මරික්කාර් මන්ත්‍රීවරයා මේ බව පැවසීය.

මැයි 1 වැනි දිනට පෙර සමගි ජන බලවේගය විසින් රටේ විශාලතම රැලිය පවත්වනු ඇතැයිද, එදිනට මැයි දින රැලි සඳහා සහභාගී වන සංඛ්‍යාව පිළිබඳව රජය සැලකිලිමත් වන බවටද ඔහු චෝදනා කළේය.

පෝය නිවාඩු දිනයද එදිනට යෙදීම නිසා සජබ මැයි දින කටයුතු රැලියකට සීමාකරන බවත්, පෙළපාළි හෝ වෙනත් සැමරුම් නොපවත්වන බවත් මරික්කාර් මන්ත්‍රීවරයා සඳහන් කළේය.

නව අතුරු පාලක මණ්ඩලයක් ක්‍රිකට් ආයතනයට පත්කරන බවත්, එහි නායකත්වය සජබ හිටපු පාර්ලිමේන්තු මන්ත්‍රී ඉරාන් වික්‍රමරත්නට ලබාදිය හැකි බවට පළවන වාර්තා පිළිබඳ ප්‍රශ්නවලට පිළිතුරු දෙමින් මරික්කාර් මන්ත්‍රීවරයා වැඩිදුරටත් පැවසුවේ, එම ජන මාධ්‍ය වාර්තා දුටු නමුත් තහවුරු කළ තොරතුරු එහි නොමැති බවයි.

ඉරාන් වික්‍රමරත්න පාසල් කාලයේ ක්‍රිකට් ක්‍රීඩාකර ඇති බවත්, එම වාර්තා සත්‍යද අසත්‍යද යන්න තහවුරු කර ගත නොහැකි බවත් ඔහු පැවසීය.

ශ්‍රී ලංකා ක්‍රිකට් පරිපාලනයේ වෙනස්කම් පිළිබඳව රජය සලකා බලමින් සිටින බවත්, දේශීය හා අන්තර්ජාතික වශයෙන් ක්‍රිකට් වගකිවයුත්තන් සමඟ සාකච්ඡා පවත්වා ඇති බවත් දේශීය ජනමාධ්‍ය ආයතන වාර්තා කර ඇත.

පසුගිය මාර්තු මාසයේදී ක්‍රීඩා අමාත්‍ය සුනිල් කුමාර ගමගේ ප්‍රසිද්ධියේ ප්‍රකාශ කළේ, මෙම කාරණය සම්බන්ධයෙන් අන්තර්ජාතික ක්‍රිකට් කවුන්සිලය සමඟ සාකච්ඡා පැවැත්වෙන බවයි.