තම වත්කම් ප්‍රකාශනය සම්බන්ධයෙන් අසත්‍ය සහ නොමඟ යවන සුළු වාර්තාවක් හිරු ටීවී ආයතනය විසින් ප්‍රකාශයට පත්කර ඇති බවට චෝදනා කරමින් අමාත්‍ය කේ.ඩී. ලාල්කාන්ත ජනමාධ්‍ය අමාත්‍යාංශයට පැමිණිල්ලක් ගොනුකර තිබේ.

පැමිණිල්ලට අනුව, මෙම ගැටළුව අමාත්‍යවරයා විසින් 2024/25 සඳහා අල්ලස් හෝ දූෂණ චෝදනා විමර්ශන කොමිසමට ස්වේච්ඡාවෙන් ඉදිරිපත් කරන ලද වත්කම් සහ බැරකම් ප්‍රකාශයක් මත පදනම්ව හිරු ටීවී ආයතනය විසින් විකාශනය කරන ලද ප්‍රවෘත්ති වාර්තාවකට අදාළ වේ.

අදාළ වාර්තාව කරුණු විකෘති කර ප්‍රකාශයේ අන්තර්ගතය වැරදි ලෙස අර්ථකථනය කර ඇති බවත්, රුපියල් මිලියන 460 කට වඩා වටිනා වත්කම් තමා සතුව ඇති බව ප්‍රකාශ කළ බවත් අමාත්‍යවරයා පවසයි.

වාර්තාව විකාශනය කිරීමට පෙර නාලිකාව තමාගෙන් පැහැදිලි කිරීමක් ලබාගැනීමට අපොහොසත් වූ බවත්, පසුව සමාජ මාධ්‍ය සහ ඩිජිටල් වේදිකා හරහා එම අසත්‍ය තොරතුරු ප්‍රවර්ධනය කළ බවත් ඔහු තවදුරටත් චෝදනා කරයි.

2023 අංක 09 දරන දූෂණ විරෝධී පනත යටතේ, ප්‍රකාශනවල ප්‍රකාශකයා සතු වත්කම් පමණක් නොව, එකම නිවසේ ජීවත් වන කලත්‍රයෙකුට සහ අවිවාහක දරුවන්ට අයත් වත්කම් ද ඇතුළත් විය යුතු බව ඇමැති ලාල් කාන්ත පැහැදිලි කරයි.

එබැවින් ප්‍රකාශනයේ ඔහුගේ බිරිඳට සහ දියණියට අයත් වත්කම් ඇතුළත් බව ඔහු පවසන අතර, නාලිකාව සිය වාර්තාවේ ඒ බව හෙළි නොකළ බව සඳහන් කරයි.

චෝදනා එල්ල වී ඇති අපහාසය සම්බන්ධයෙන් අදාළ නාලිකාවෙන් රුපියල් බිලියන 10 ක වන්දි ඉල්ලා තම නීතිඥයින් හරහා දැනටමත් එන්තරවාසියක් යවා ඇති බවද අමාත්‍යවරයා පැවසීය.

විශේෂයෙන් තම දියණියගේ නමින් ලියාපදිංචි කර ඇති දේපළ සහ සමාගම් කොටස් සම්බන්ධයෙන් සංඛ්‍යා හිතාමතාම අතිශයෝක්තියට නංවා ඇති බව ඔහු පෙන්වාදෙයි.

ඔහු අනුරාධපුරයේ පැවති උත්සවයක් අමතමින් මෙසේද සඳහන් කළේය.

“අපි අහගෙන ඉඳලා ඉඳලා ෂොට් එක දෙන්න ඕන වෙලාවට ෂොට් එක දෙනවා. දැන් එකෙකුට දීලා තියෙන්නේ. ඉතුරු එවුනුත් පරිස්සමින් ඉඳපල්ලා. කියන ඒවා ඇත්ත කියහල්ලා. ඒ අත්තවලට අපි උත්තර දෙනවා….අපිට එක එක දේවල් කියාගෙන යනවා. කියාගෙන යන්න. ඇති තරම් කියාගෙන යන්න. අපි තෝරලා තැනට ආවට පස්සේ හෙල්ලෙන්න බැරි වෙන්න දෙනවා. දැන් එක ලියුමයි. සමාව…සමාව…නෑ. සමාව දෙන්නේ නෑ. අවශ්‍ය නීතිමය රාජකාරි ඔක්කොම හරියටම කරනවා. කුපාඩි වැඩ තක්කඩි වැඩ බලු වැඩ ඔක්කොම කරලා…කරලා…අපි ඒවා අහගෙන ඉඳලා ඉඳලා..අපහාස අවමන් විඳලා එක පියවරක් ගත්ත ගමන් කියනවා වැරදීමක් වෙලාලු. සමාවෙන්නලු. සමාවෙන්න තියෙන අයිතිය යටතේ. චාන්ස් දෙන්නේ නෑ. මොකද රටේ ජනතාව අපිට දොස් කියනවා, එකසිය පනස් නවයක බලයකුත් දීලා, විධායක ජනාධිපතිකමත් දීලා, ඔය බලන් ඉන්නේ ඇයි කියලා….”