ගල් අඟුරු ප්‍රසම්පාදනය පිළිබඳ විමර්ශනයට අදාළ සියලුම ලිපිගොනු තමන් භාරයට ගෙන ඇති බවත්, ගල් අඟුරු ප්‍රසම්පාදනයට අදාළ එම ලේඛන ඇගයීම දැනටමත් ආරම්භ කර ඇති බවත් අපරාධ පරීක්ෂණ දෙපාර්තමේන්තුව පවසයි.

අදාළ ලේඛන භාරයේ සිටි සියලුම නිලධාරීන්ගෙන් ප්‍රකාශ සටහන් කර ගෙන ඇති බව දෙපාර්තමේන්තුව තවදුරටත් පැවසීය.

ගල් අඟුරු ප්‍රසම්පාදනය සම්බන්ධයෙන් විද්‍යුත් දත්ත පරීක්ෂා කිරීම ද මේ වන විට සිදුවෙමින් පවතින බව අපරාධ පරීක්ෂණ දෙපාර්තමේන්තුව පැවසීය.

කොහුවල පිහිටි ලංකා ගල් අඟුරු සමාගමේ ප්‍රධාන කාර්යාලයට අප්‍රේල් 11 වැනිදා මුද්‍රා තැබිණි.

2009 සිට ගල් අඟුරු ආනයනය කිරීම සම්බන්ධයෙන් පරීක්ෂණයක් ඉල්ලා ජනාධිපති ලේකම් ආචාර්ය නන්දික සනත් කුමානායක විසින් මෑතකදී අපරාධ පරීක්ෂණ දෙපාර්තමේන්තුවට ගොනු කරන ලද පැමිණිල්ලකට අනුව මෙය සිදු විය.

ලංකා ගල් අඟුරු සමාගමේ ප්‍රධාන කාර්යාලයට පැය 24 පුරා ආරක්ෂාව සැපයීම සඳහා පොලිස් නිලධාරීන් හතර දෙනෙකු සහ අපරාධ පරීක්ෂණ දෙපාර්තමේන්තුවේ නිලධාරීන් දෙදෙනෙකු පත් කර ඇත.