එක්සත් ජනපදයේ බෞද්ධ භික්ෂූන් වහන්සේගේ සහභාගීත්වයෙන් ලබන අඟහරුවාදා ශ්‍රී ලංකාවේදී ආරම්භ වන සාමය සඳහා පාගමනට භික්ෂූන් වහන්සේ සමග සහභාගී වීමට නියමිත ආලෝකා සාම සුනඛයා වෙනුවෙන් විශේෂ ආරක්ෂක විධිවිධාන සකස් කරමින් තිබේ.

ඇමරිකාව පුරා භික්ෂූන් වහන්සේගේ සැතපුම් 2,300ක සාම පාගමනේදී එක්සත් ජනපදයේ මිලියන සංඛ්‍යාත ජනතාවගේ හදවත් දිනාගත් ‘සාම සුනඛයා’ ලෙස හැඳින්වෙන ආලෝකා මෙම වැඩසටහනට සහභාගී වන බව පූජ්‍ය මෙල්පිටියේ විමලකිත්ති හිමියෝ තහවුරු කළහ.

කෙසේවෙතත්, එක්සත් ජනපදයේ මෙන් ආලෝකාට පාගමනට සම්බන්ධ වීමට හැකි වේද යන්න තවමත් අවිනිශ්චිතය.

අයාලේ යන සුනඛයන්ගෙන් එල්ල වන තර්ජන පිළිබඳ කණස්සල්ල මතු වී ඇති බව විමලකිත්ති හිමියෝ සඳහන් කළහ.

ශ්‍රී ලංකාවේ ප්‍රජා සුනඛයන් බිරීම නිසා ‘සාමය සඳහා පාගමන’ වැඩසටහනට බාධා කළ හැකි බව උන්වහන්සේ පැහැදිලි කර තිබේ.

මෙම ගැටළු විසඳීම සඳහා, වැඩසටහන අධීක්ෂණය කරන ආරක්ෂක හමුදා නිලධාරීන් සමඟ සිකුරාදා රැස්වීමක් පැවැත්විණි.

ආලෝකාගේ ආරක්ෂාව සහතික කිරීම සඳහා අවශ්‍ය පූර්වාරක්ෂාවන් ගන්නා බවට පූජ්‍ය විමලකිත්ති හිමියන්ට එහිදී සහතිකවී ඇත.

පූජ්‍ය පඤ්ඤාකර හිමියන් සහ උන්වහන්සේගේ ප්‍රධාන සංඝනායකහිමියන්ද සිකුරාදා ශ්‍රී ලංකාවට වැඩම කළහ.

ඔවුන්ගේ පාගමන ආරම්භ වන්නේ අත්තනගල්ල මහා විහාරය නැරඹීමෙන් පසුව අනුරාධපුරය බලා යන බස් ගමනකින් වන අතර එහිදී ඔවුන් ශ්‍රී මහා බෝධියෙන් පැළයක් ලබාගෙන රුවන්වැලි මහා සෑය දෙසට වැඩම කරනු ඇත.

සාම පා ගමන බදාදා දඹුල්ල සිට මාතලේ දක්වා කොටස ආවරණය කරමින් ආරම්භ වන අතර අප්‍රේල් 28 වැනිදා නිදහස් චතුරශ්‍රයේදී රාජ්‍ය උත්සවයක් පැවැත්වීමෙන් අවසන් වේ.

එම රාජ්‍ය උත්සවයේ දී ජනාධිපති අනුර කුමාර දිසානායක ඇමරිකානු භික්ෂූන් වහන්සේගේ නියෝජිත පිරිසට බෝ පැළය නිල වශයෙන් භාරදීමට අපේක්ෂා කෙරේ.