ශ්‍රීලන්කන් ගුවන් සේවය සඳහා එයාර් බස් ගුවන් යානා මිලදී ගැනීමේදී අල්ලස් ලබා ගත් බවට චෝදනා එල්ල වී ඇති සිද්ධියක් සම්බන්ධයෙන් දැනට රක්ෂිත බන්ධනාගාරගත කර සිටින එම ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේනගේ ඇප අයදුම්පත ප්‍රතික්ෂේප කිරීමට කොළඹ මහේස්ත්‍රාත් අධිකරණය අද නියෝග කළේය.

අල්ලස් කොමිසමේ නිලධාරීන් සහ සැකකරු වෙනුවෙන් පෙනී සිටින නීතිඥවරුන් විසින් ඉදිරිපත් කරන ලද කරුණු සළකා බැලීමෙන් පසු කොළඹ ප්‍රධාන මහේස්ත්‍රාත් අසංග එස්. බෝදරගම මෙම නියෝගය නිකුත් කර තිබේ.

ඒ අනුව, සැකකරු අප්‍රේල් 28 වැනිදා දක්වා තවදුරටත් රක්ෂිත බන්ධනාගාරගත කිරීමට මහේස්ත්‍රාත්වරයා නියෝග කළේය.

එයාර් බස් ගුවන් යානා ගනුදෙනුවට අදාළව ඇමරිකානු ඩොලර් මිලියන 2ක අල්ලසක් ලබා ගැනීමේ චෝදනාව මත ශ්‍රීලන්කන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේන පසුගිය මාර්තු 12 වැනිදා අල්ලස් හෝ දූෂණ චෝදනා විමර්ශන කොමිසම විසින් අත්අඩංගුවට ගන්නා ලදී.

2013 දී ඇමරිකානු ඩොලර් බිලියන 2.3ක් වටිනා ගුවන් යානා 10ක් මිලදී ගැනීමේ ගනුදෙනුවේදී ශ්‍රීලන්කන් ගුවන් සමාගමේ ප්‍රධාන විධායක නිලධාරියා ලෙස කටයුතු කළ චන්ද්‍රසේනට ඇමරිකානු ඩොලර් මිලියන 16ක අල්ලසක් ලබා ගැනීමට කුමන්ත්‍රණය කිරීම සහ සිංගප්පූරුවේ බැංකු ගිණුමකට යුරෝ මිලියන 1.45ක් ලබා ගැනීම සම්බන්ධයෙන් චෝදනා එල්ල වී තිබේ.

චන්ද්‍රසේන තම බිරිඳගේ නමින් බෲනායි හි ෂෙල් සමාගමක් නිර්මාණය කර එම මුදල් එහි සිංගප්පූරු ගිණුමට ගෙවීමට කටයුතු කළ බවට ද චෝදනා එල්ල වී ඇත.