මරදන්කඩවල සහ හික්කඩුව යන ප්‍රදේශවල අඟහරුවාදා (07) වාර්තා වූ අනතුරුවලින් හය හැවිරිදි ළමුන් දෙදෙනකු මියගිය අතර, එම සිදුවීම් සම්බන්ධයෙන් කොට්ඨාශ දෙකෙහිම පොලිසිය පරීක්ෂණ ආරම්භ කර ඇත.

මරදන්කඩවල ප්‍රදේශයේ පදිංචි හය හැවිරිදි පිරිමි ළමයකු කොල්ලකුට්ටිගම ප්‍රදේශයේ අඩි හතක් පමණ ගැඹුරු ජලයෙන් පිරුණු වළකට වැටීමෙන් මියගොස් ඇත.

පොලිසියට අනුව, දරුවා තම සහෝදර සහෝදරියන් දෙදෙනා සහ මිතුරන් කිහිපදෙනකු සමඟ ඉදිකරමින් පවතින නිවසක් අසල ගිරවුන් ඇල්ලීමට ගොස් වළට වැටී ඇත.

මරදන්කඩවල පොලිසිය ඒ සම්බන්ධයෙන් වැඩිදුර පරීක්ෂණ පවත්වයි.

මේ අතර, හික්කඩුව, වෑවල දී කොළඹ-ගාල්ල ප්‍රධාන මාර්ගයේ ගාල්ල දෙසට ගමන් කළ මගී බස් රථයක් සහ ප්‍රතිවිරුද්ධ දිශාවෙන් පැමිණි ත්‍රිරෝද රථයක් මුහුණට මුහුණ ගැටීමෙන් සිදුවූ අනතුරකින් 06 හැවිරිදි දරුවකු මියගිය බව වාර්තා විය.

ත්‍රිරෝද රථයේ රියදුරු, කාන්තාවන් දෙදෙනෙකු සහ දරුවා තුවාල ලබා ආරච්චිකන්ද රෝහලට ඇතුළත් කර ඇත.

දික්වැල්ල පදිංචි හය හැවිරිදි දරුවා පසුව මියගොස් තිබේ.

තුවාල ලැබූ අනෙක් පුද්ගලයන් වැඩිදුර ප්‍රතිකාර සඳහා කරාපිටිය රෝහලට මාරුකර යවා ඇත.

බස් රථ රියදුරු අත්අඩංගුවට ගෙන ඇති අතර හික්කඩුව පොලිසිය වැඩිදුර පරීක්ෂණ පවත්වයි.