හංවැල්ල පොලිස් ස්ථානයට අනුයුක්තව සේවය කළ පොලිස් නිලධාරීන් තිදෙනෙකු විසින් 2023 දී නීති විරෝධී ලෙස අත්අඩංගුවට ගැනීම, රඳවා තබා ගැනීම සහ වධහිංසා පැමිණවීම සම්බන්ධයෙන් දෛනික වැටුප් ලබන්නකුට රුපියල් 225,000ක වන්දියක් ගෙවන ලෙස ශ්‍රේෂ්ඨාධිකරණය නියෝග කර තිබේ.

අගතිය හෝ සමාජ පැතිකඩ මත පදනම්ව, විශේෂයෙන් දුර්වල ආර්ථික තත්ත්වය හේතුවෙන් පුද්ගලයන්ට වෙනස් ලෙස සැළකීමට නීතිය ක්‍රියාත්මක කරන බලධාරීන්ට ආණ්ඩුක්‍රම ව්‍යවස්ථාවෙන් අවසර නොමැති බව ශ්‍රේෂ්ඨාධිකරණය තීරණය කළේය.

හංවැල්ල පොලිසියට අනුයුක්ත නිලධාරීන් විසින් 2023 දී සොරකමක් සම්බන්ධයෙන් නීති විරෝධී ලෙස අත්අඩංගුවට ගෙන වධහිංසා පමුණුවන ලද 21 හැවිරිදි දෛනික වැටුප් ලබන්නකු විසින් ගොනු කරන ලද මූලික අයිතිවාසිකම් අයදුම්පතක් සළකා බැලීමේදී ශ්‍රේෂ්ඨාධිකරණය මෙම තීන්දුව ලබා දුන්නේය.

පෙත්සම්කරුගේ මූලික අයිතිවාසිකම් උල්ලංඝනය කර ඇත්තේ ව්‍යවස්ථාමය ආරක්ෂණ නොසලකා හැරීමෙන් බව ශිරාන් ගුණරත්න, කේ. ප්‍රියන්ත ප්‍රනාන්දු සහ සෝභිත රාජකරුණා යන විනිසුරුවරුන්ගෙන් සමන්විත ත්‍රිපුද්ගල විනිසුරු මඩුල්ලක් විසින් නිරීක්ෂණය කළේය.

ආණ්ඩුක්‍රම ව්‍යවස්ථාවේ 11, 12(1), 12(2), 13(1) සහ 13(2) වගන්ති යටතේ සහතික කර ඇති පෙත්සම්කරුගේ මූලික අයිතිවාසිකම් වගඋත්තරකරුවන් තිදෙනා විසින් උල්ලංඝනය කර ඇති බව ද අධිකරණය තීරණය කළේය.

පොලිස් නිලධාරීන් තිදෙනාගේ ක්‍රියාවන් පොලිස් ආඥා පනතේ සහ අපරාධ නඩු විධාන සංග්‍රහයේ විධිවිධාන උල්ලංඝනය කර ඇති බව ද විනිසුරු මඩුල්ල සඳහන් කළේය.

ප්‍රභාෂණ භාෂිත නයනංජන, සුරංග සිසිර කුමාර සහ වසන්ත කුමාර යන නිලධාරීන් තිදෙනාට ඔවුන්ගේ පෞද්ගලික අරමුදල්වලින් රුපියල් 75,000 බැගින් ගෙවන ලෙස අධිකරණය නියෝග කළ අතර මුළු වන්දි මුදල රුපියල් 225,000කි.

ගෙවීම් මාස හයක් ඇතුළත සිදු කළ යුතුය.

ඊට අමතරව, තීන්දුවේ සහතික කළ පිටපතක් ජාතික පොලිස් කොමිසමට යොමු කරන ලෙස ශ්‍රේෂ්ඨාධිකරණයේ රෙජිස්ට්‍රාර්වරයාට උපදෙස් දී ඇත.

සිද්ධියට සම්බන්ධ පොලිස් නිලධාරීන්ගේ හැසිරීම සම්බන්ධයෙන් සුදුසු ක්‍රියාමාර්ග කොමිසම විසින් සළකා බලනු ඇතැයි අපේක්ෂා කෙරේ.