ඉරානය සහ ගෝලීය කටයුතුවලදී එහි භූමිකාව පිළිබඳව පවතින විකෘති කිරීම් සහ ගොතන ලද කථාන්දරවලින් ඔබ්බට බලන ලෙස ඉල්ලා සිටිමින් ඉරාන ජනාධිපති මසූඩ් පෙසෙෂ්කියන් ඇමරිකානු ජනතාව වෙත ලිපියක් නිකුත් කර ඇත.

එම පණිවිඩය මගින් පෙසෙෂ්කියන් අවධාරණය කර ඇත්තේ, ඉරානය ලොව පැරණිතම ශිෂ්ටාචාරවලින් එකක් ලෙස දිගු ඉතිහාසයක් ඇති රටක් බවත්, ආක්‍රමණ, සම්බාධක සහ විදේශීය මැදිහත්වීම්වලට මුහුණ දුන්නද නූතන යුගයේ කිසිදු අවස්ථාවක තම රට යුද්ධයක් ආරම්භ කර නොමැති බවත්ය.

ඉරාන ජාතිකයන් රජයන් සහ සාමාන්‍ය ජනතාව අතර වෙනස හඳුනාගන්නා බවත්, ඇමරිකානුවන් කෙරෙහි ඔවුන්ගේ කිසිදු වෛරයක් නොමැති බවත් ඔහු සඳහන් කරයි.

ඉරානය වටා පවතින ඇමරිකානු හමුදා ආක්‍රමණය විවේචනය කරන මෙම ලිපිය හරහා, 1953 වසරේ වොෂින්ටනයේ සහය ඇතිව සිදු වූ කුමන්ත්‍රණය, 1980 දශකයේ යුද්ධයේදී සදාම් හුසේන්ට ලබාදුන් සහය සහ නැවත නැවතත් පැනවූ සම්බාධක පිළිබඳව මතක්කර දෙයි.

මෙම පීඩනයන් හමුවේ ඉරානය දුර්වල වී නොමැති බව තර්ක කළ පෙසෙෂ්කියන්, ඒ වෙනුවට සාක්ෂරතාවය, අධ්‍යාපනය, සෞඛ්‍ය සේවා සහ තාක්ෂණ අංශවල ලබා ඇති දියුණුව පෙන්වාදෙයි.

මෑතකාලීන නොසන්සුන්තාවන් පිළිබඳව ද අදහස් දක්වමින් ඔහු ප්‍රකාශ කරන්නේ, ඉරානය සාකච්ඡා මාර්ගයෙන් කටයුතු කළ බවත්, එකඟතාවයකට පැමිණ තම සියලු පොරොන්දු ඉටුකළ බවත්ය.

එම එකඟතාවයෙන් ඉවත් වීමටත්, ගැටුම්කාරී තත්ත්වයක් කරා ගමන් කිරීමටත්, සාකච්ඡා පවතින අතරතුර ආක්‍රමණශීලී ක්‍රියා දෙකක් දියත් කිරීමටත් ගත් තීරණය ඇමරිකානු රජය විසින් ගනු ලැබූ විනාශකාරී තේරීම් බවත්, එම තේරීම් විදේශීය ආක්‍රමණිකයෙකුගේ මුසාවන් වෙනුවෙන් සිදු කළ ඒවා බවත් ඉරාන ජනාධිපතිවරයා වැඩිදුරටත් පැහැදිලි කරයි.