හලාවත-කුරුණෑගල මාර්ගයේ තිරික්කලයක් අනතුරුදායක ලෙස ධාවනය කර අනතුරක් සිදුකිරීම සම්බන්ධයෙන් හලාවත පොලිසිය විසින් පුද්ගලයකු අත්අඩංගුවට ගෙන තිබේ.

මාර්තු 22 වන දින සවස 6.30ට පමණ තිත්තකඩේ ප්‍රදේශයේදී අදාළ තිරික්කලය ඉදිරියෙන් පැමිණි මෝටර් රථයක ගැටීමෙන් මෙම අනතුර සිදුවී ඇත.

හලාවත පොලිසියේ රථවාහන අංශයේ විමර්ශනවලින් හෙළි වූයේ මාර්ගය භාවිත කිරීමට නිසි අවසරයකින් තොරව තිරික්කලය ධාවනය කර ඇති බවයි.

මාර්ගයේ ගමන් කරමින් සිටියදී තිරික්කලයේ බැඳ සිටි ගවයාට එය පැදවූ පුද්ගලයා පහර දී ඇති බවත්, සිද්ධිය වූ අවස්ථාවේ ධාවන තරඟ සඳහා සත්වයා පුහුණු කරමින් සිට ඇති බවත් පොලිසිය තවදුරටත් පැවසීය.

සැකකරු අත්අඩංගුවට ගෙන සත්ව හිංසන පනත යටතේ හලාවත මහේස්ත්‍රාත් අධිකරණයට ඊයේ (25) ඉදිරිපත් කරන ලදී.

සැකකරු රුපියල් 20,000ක පෞද්ගලික ඇපයක් මත අධිකරණය විසින් නිදහස් කළ අතර නඩු විභාගය සඳහා පසුව දිනයක් නියම කළේය.

සිද්ධියට සම්බන්ධ අනෙකුත් පුද්ගලයන් හඳුනාගෙන අත්අඩංගුවට ගැනීම සඳහා වැඩිදුර පරීක්ෂණ ආරම්භ කර ඇති බව හලාවත මූලස්ථාන පොලිසිය පැවසීය.